काठमाडौं । सरकारले गण्डकी प्रदेशमा आयोजना हुने नवौँ राष्ट्रिय खेलकुद प्रतियोगिता तयारी र सम्पन्न गर्न ६० करोड रुपैयाँ छुट्याएको छ । आगामी असोज २८ देखि कात्तिक ३ गतेसम्म आयोजना हुने उक्त प्रतियोगिताको लागि ६० करोड रुपैयाँ छुट्याएको राष्ट्रिय खेलकुद परिषद् (राखेप) का सदस्य-सचिव टंकलाल घिसिङले बताए । उनले उक्त रकम तीनपटक गरेर लिनेसमेत जानकारी दिएका छन् ।
पहिलो चरणमा १० करोड, दोस्रो चरणमा २३ करोड र तेस्रो चरणमा २७ करोड रुपैयाँ लिने उनको भनाइ छ । सरकारले पहिलो चरणका लागि १० करोड रुपैयाँ रकम भने विनियोजन गरिसकेको छ ।
उक्त रकम विभिन्न प्रदेशमा प्रतियोगिताको तयारीका लागि पठाइसकेको सदस्य-सचिव घिसिङले जानकारी दिएका छन् । राखेपले उक्त प्रतियोगिताको काउन्टडाउनसमेत सुरु गरिसकेको छ । अब उक्त प्रतियोगिता सञ्चालन हुन ५० दिन बाँकी छ ।
प्रतियोगितामा विभिन्न ३६ खेल समावेश गरिएको छ । खेलमा ११ टोलीको सहभागिता रहनेछ । प्रतियोगितामा तीन सय ९३ स्वर्ण, तीन सय ९३ रजत र ६ सय कास्य पदकका लागि प्रतिस्पर्धा हुनेछ । उक्त प्रतियोगिताको खेलस्थल भने यही भदौ १५ गतेसम्म टुंगो लाग्ने राखेप सदस्य-सचिव घिसिङले बताए ।
