काठमाडौं । नेपाली राष्ट्रिय महिला फुटबल टिमले उपविजेतामै चित्त बुझाएको छ । दशरथ रंगशालामा सोमबार भएको फाइनलमा बंगलादेशसँग ३-२ ले पराजित हुँदै नेपाल उपविजेतामै सीमित भयो ।
यसअघि ५ मध्ये चारपटक फाइनल खेलेको नेपाल भारतसँग पराजित हुँदै आएको थियो । यसपालि भने सेमिफाइनलमा भारतलाई पराजित गर्दै फाइनल पुगेको नेपाल अन्ततः बंगलादेशसँग ३-१ गोल अन्तर पराजित हुन पुग्यो । इतिहासमै दोस्रोपटक फाइनल खेलेको बंगलादेशले यसपटक नेपाललाई पराजित गर्दै पहिलोपटक च्याम्पियन बन्न सफल भयो ।
खेलको १४औं मिनेटमा साम सुनाहरले गोल गर्दै बंगलादेशलाई अग्रता दिलाएकी थिइन् । उनी १०औं मिनेटमा जहान सोप्ताको स्थानमा मैदान प्रवेश गरेकी थिइन् । मैदान प्रवेश गरेलगत्तै गोल गरेपछि बंगलादेशको टिमको आत्मविश्वास बढेको थियो । ४२औं मिनेटमा श्रीमोती कृष्णरानी सरकारले गोल गर्दै बंगलादेशको अग्रतालाई दोब्बर पारेकी थिइन् ।
पहिलो हाफमा २ गोलले पछि परेको नेपालले दोस्रो हाफमा १ गोल फर्काउँदा उल्टै १ गोल खानुपरेको थियो । ७०औं मिनेटमा अनीता बस्नेतले गोल गर्दै नेपाललाई २-१ को अवस्थामा पुर्याएकी थिइन् । ७७औं मिनेटमा पुन: कृष्णारानीले गोल गरेपछि बंगलादेश ३-१ को जित निकाल्दै उपाधि चुम्न सफल भयो ।
