काठमाडौं, १६ साउन । कोशी प्रदेशका सभामुख बाबुराम गौतमले पदबाट राजीनामा दिएका छन् । उनले मंगलबार सरकार गठनका लागि बहुमत पुर्याउन पदबाट राजीनामा दिएका हुन् । उनले उपसभामुख सिर्जना दनुवारलाई आफ्नो राजीनामा बुझाएका हुन् । कोशी प्रदेशमा कांग्रेस प्रदेश संसदीय दलका नेता उद्धव थापालाई मुख्य मन्त्री बनाउन र उनको पक्षमा बहुमत जुटाउन सभामुख गौतमले राजीनामा दिएका हुन् ।
थापाको नेतृत्वमा सरकार बनाउने केन्द्रीय सत्ता गठबन्धनले निर्णय गरेको छ । सुरुमा राजीनामा नदिने बताउँदै आएका गौतमले प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डको सल्लाह र आग्रहमा राजीनामा दिएका हुन् । गौतमले राजीनामा दिएपछि गठबन्धन दलको समर्थनमा कांग्रेसका नेता थापाले प्रदेश प्रमुख परशुराम खापुङसमक्ष मुख्यमन्त्रीमा नियुक्तिका दाबी पेस गर्न जाने तयारी गरेका छन् । गौतमको राजीनामाले कांग्रेस नेता थापालाई मुख्यमन्त्रीमा नियुक्तिका लागि दावी पेस गर्न बहुमत पुगेको छ ।
९३ सदस्यीय कोशी प्रलेश सभामा एमालेका ४०,नेपाली कांग्रेसका २९,माओवादीका १३, राप्रपाका ६, नेकपा एककिृत समाजवादीका ४ र जनता समाजवादीका १ सांसद रहेका छन् । सरकार गठनमा बहुमत पुर्याउन ४७ जनाको समर्थन चाहिन्छ ।
