काठमाडौँ २१ कात्तिक/ नेपाली काँग्रेसका सभापति शेरबहादुर देउवाले प्रधानमन्त्री पुष्पकमल दाहाल प्रचण्डलाई आज भेट गरी भूकम्प पीडितहरूको सहयोगका लागि नेपाली काँग्रेसका तर्फबाट ५० लाख रुपैयाँको चेक हस्तान्तरण गरेका छन् ।
सभापति देउवा महामन्त्रीद्वय गगन थापा र विश्वप्रकाश शर्मालाई साथ लिएर बिहान प्रधानमन्त्री निवास बालुवाटार गएका थिए । भेटका अवसरमा प्रधानमन्त्रीले सरकारले भूकम्प प्रभावित क्षेत्रमा गरिएको उद्धार, उपचार र राहतका बारेमा सभापति देउवालाई जानकारी गराएका थिए ।
भेटमा सभापति देउवाले सरकारले गरेको भूकम्प पीडितहरूको उद्धार, उपचार कार्यको प्रशंसा गर्दै राहत वितरणलाई व्यवस्थित र प्रभावकारी बनाउन सुझाव दिएको जानकारी प्रधानमन्त्रीको सचिवालयले दिएको छ ।
