स्याङ्जा, ३ साउन । नेपाली कांग्रेसका केन्द्रीय उपसभापति धनराज गुरुङले आज स्याङ्जाका पहिरो प्रभावित क्षेत्रहरुको निरीक्षण गर्नुभएको छ ।
गत असार २१ देखि २३ गतेसम्मको अविरल वर्षाका कारण बाढीपहिरोले क्षति पुर्याएका भीरकोट, वालिङ र गल्याङ नगरपालिकाका विभिन्न बस्तीको निरीक्षण गर्नुभएको हो । विशेषगरी पहिरोले पुरिएर ज्यान गुमाएका परिवार र विस्थापित परिवारलाई उहाँले व्यक्तिगत रुपमा जनही रु १० हजार सहयोग उपलब्ध गराउनुभयो ।
पूर्वमन्त्रीसमेत रहनुभएका गुरुङले आजै भीरकोट नगरपालिका–५ ज्यामिरेमा गत असार २२ गते पहिरोमा पुरिएर ज्यान गुमाउनुभएकी ७४ वर्षीया ख्यामकुमारी मल्लको परिवारलाई रु १० हजार उपलब्ध गराउनुभएको हो ।
भीरकोट–६ को फोक्सिङमा पहिरोले विस्थापित हुनुभएका भक्तबहादुर थापाको परिवारलाई पनि उहाँले नगद रु १० हजार उपलब्ध गराउनुभयो । “नागरिकहरु दुःखमा परेका बेला यहाँको जनप्रतिनिधि भएको नाताले व्यक्तिगत रुपमा जे सकेँ त्यो सहयोग गरेँ”, उहाँले भन्नुभयो, “जनधन क्षति भएकालाई क्षतिपूर्तिको व्यवस्था र आवास निर्माणका लागि आवश्यक पहल गर्नेछु ।”
भीरकोट–५ को ज्यामिरे र ६ को फोक्सिङमा पहिरोका कारण आठ घर जोखिममा छन् ।
