काठमाडौं, २८ बैशाख । भारत र पाकिस्तानबीचको सीमा क्षेत्रमा फेरि एकपटक तनाव चुलिएको छ । दुबै देशले एक अर्कामाथि युद्ध विराम उल्लङ्घन गरेको गम्भीर आरोप लगाउँदै आ-आफ्नो पक्ष प्रस्तुत गरेका छन् । पछिल्लो चार दिन यता भएका घटनाक्रमले दुई मुलुकबीचको सम्बन्ध दशकमै सबैभन्दा खराब अवस्थामा पुगेको बताइएको छ ।
भारतीय विदेशमन्त्री विक्रम मिस्रीले आइतबार भारत अधीनस्थ काश्मीरमा विस्फोटको आवाज सुनिएको पुष्टि गर्दै युद्ध विराम उल्लङ्घन भएको आरोप लगाउनु भएको छ। उहाँका अनुसार पछिल्लो केही दिनमा पटक(पटक युद्ध विरामको नियम उल्लङ्घन भएको छ । उनले भारतीय सेनालाई यसबारे जानकारी दिइसकेको समेत बताउनुभयो।
तर, केही समय नबित्दै पाकिस्तानी विदेशमन्त्रीले प्रेस विज्ञप्तिमार्फत पाकिस्तान युद्ध विरामको पक्षमा दृढ रहेको उल्लेख गर्दै उल्टै भारतले युद्ध विराम तोडेको आरोप लगाउनुभयो। उहाँका अनुसार पाकिस्तानले पहलकदमीका रूपमा संयम अपनाउँदै आएको छ ।
उल्लेखनीय छ, यो तनाव २२ अप्रिलमा कश्मीरको पहलगाममा भएको आतंकवादी हमलापछि चर्किएको हो । भारतले सो हमलाको जवाफस्वरूप सैन्य आक्रमणको थालनी गरेको थियो । आक्रमणमा मिसाइल र ड्रोन प्रयोग गरिएको भारतीय पक्षको दाबी छ । पाकिस्तानले भने पहलगाम घटनासँग आफ्नो कुनै संलग्नता नरहेको स्पष्ट पारेको छ ।
उक्त घटनाक्रमबीच अमेरिकी राष्ट्रपति डोनाल्ड ट्रम्पले सामाजिक सञ्जालमार्फत अमेरिका तथा अन्य मुलुकहरूको मध्यस्थतामा युद्ध विराममा सहमति भएको जानकारी दिएका थिए । भारतीय विदेशमन्त्री मिस्रीले पनि पछि सो कुरा पुष्टि गर्दै करिब तीन दर्जन देशहरूको कूटनीतिक प्रयासबाट युद्ध विराम सम्भव भएको बताए । तर, सो घोषणाको केही घण्टामै काश्मीर क्षेत्रमा पुनः विस्फोटको आवाज सुनिएको बीबीसीले जनाएको छ ।
युद्ध विरामको घोषणासँगै केही आशा पलाए पनि पछिल्ला घटनाक्रमले पुनः अस्थिरता बढाएको छ । विश्लेषकहरूका अनुसार यस्ता आरोप(प्रत्यारोप र सीमावर्ती क्षेत्रका घटनाले क्षेत्रीय सुरक्षामा गम्भीर चुनौती थप्ने देखिन्छ ।
