काठमाडौं । काठमाडौंको गोठाटारमा गोली लागेर सख्त घाइते भएका लाल मोहम्मद भन्ने मोहम्मद दर्जीको उपचारका क्रममा मृत्यु भएको छ ।
सर्लाहीको हरिवन नगरपालिका २ का ५५ वर्षीय मोहम्मदलाई सोमबार साँझ बन्दुकधारी समूहले गोली हानेको थियो । उनको टाउकोमा दुईवटा र दाहिने तिघ्रामा एउटा गोली लागेको थियो ।
त्रिवि शिक्षण अस्पतालले उनलाई मृत घोषणा गरेको उपत्यका प्रहरी कार्यालयले जनाएको छ । जिल्ला प्रहरी परिसर काठमाडौंका प्रवक्ता दिनेशराज मैनालीका अनुसार गोठाटारको कृष्ण मन्दिरनजिकै मोटरसाइकलमा आएका दुईजना अपरिचित व्यक्तिले दर्जीमाथि गोली प्रहार गरेर फरार भएका छन् ।
प्रहरीले गोली प्रहारमा संलग्नको खोजीकार्य तीव्र बनाएको छ ।
