काठमाडौं । क्रिकेटर सन्दीप लामिछानेलाई जिल्ला अदालत काठमाडौंमा लगिएको छ । बलात्कार आरोपमा पक्राउ परेका उनलाई आज (सोमबार) अदालतमा उपस्थित गराइएको हो ।
अदालतले उनलाई थप सात दिन हिरासतमा राखेर अनुसन्धान गर्न अनुमति दिएको छ । अदालतले २० गतेदेखि गणना हुने गरी ७ दिनका लागि म्याद थप गरेको हो । अदालतमा उपस्थित भएसँगै लामिछानेलाई ७ दिनको म्याद थप गरी अनुसन्धान गर्न अनुमति दिइएको हो ।
दसैं बिदाका कारण अदालत बन्द रहेकाले सन्दीपलाई सोमवार म्याद थपका लागि मात्रै अदालत लगेको बुझिएको छ । उनलाई आज पहिलो पटक अदालतमा उपस्थित गराइएको हो । क्यारेबियन लिग खेल्न गएका उनले गत बिहीवार प्रहरीसमक्ष आत्मसमर्पण गरेका थिए ।
लामिछानेलाई जिल्ला अदालतमा लगिएपछि सुरक्षा व्यवस्था कडा पारिएको थियो । गत बिहीवार बिहान कतार एयरवेजको विमानबाट उनी काठमाडौं आएका थिए । त्रिभुवन अन्तर्राष्ट्रिय विमानस्थलमा ओर्लिनेवित्तिकै उनले प्रहरी समक्ष आत्मसमर्पण गरेका थिए ।
लामिछानेविरुद्ध एक १७ वर्षीया किशोरीले बलात्कार गरेको भन्दै उजुरी दिएकी छन् । गएको भदौ २१ गते उनीविरुद्ध भदौ ५ गते आफूमाथि बलात्कार गरेको गरेको भन्दै नाबालिगले उजुरी दिएकी हुन् ।
