निर्वाचन सकिएको चार दिनपछि निर्वाचन आयोगले सहरी विकास मन्त्रालयले स्वीकृत गरेका तीन अर्ब ४० करोड रूपैयाँ बराबरका बागमती सुधार, एकीकृत बस्ती विकास, नयाँ सहर, सघन सहर तथा काठमाडौं उपत्यका विकासका ५४ वटा बहुवर्षीय कार्यक्रम रद्द गराएको छ। आयोगले यही बिहीबार मन्त्रालयलाई चिठी लेखेर मन्त्रालयले गत असोज १२ (निर्वाचन आचार संहिता लागु भएको दिन) देखि हालसम्म स्वीकृत गरेका सबै कार्यक्रम रद्द गर्न र रद्द गरिएका कार्यक्रमको विवरण आयोगलाई पठाउन निर्देशन गरेको छ।
आयोगको निर्देशनपछि मन्त्रालयले शुक्रबार आयोगलाई चिठी लेखर असोज १२ यता स्वीकृत भएका सबै कार्यक्रम रद्द भएको जानकारी गराएको छ। साथै रद्द गरिएका कार्यक्रमको विवरण पनि पठाएको छ। आयोगको निर्देशनपछि मन्त्रालयका निमित्त सचिव पदम मैनालीले शुक्रबार सचिवस्तरीय निर्णयबाट मन्त्रालय मातहतका ५४ वटा बहुवर्षीय कार्यक्रम रद्द गरेका छन्।
तत्कालीन सहरी विकास सचिव रमेश सिंहले सचिवस्तरीय निर्णयबाट मौन अवधि प्रारम्भ भएका बेला मंसिर २ गते ५४ वटा बहुवर्षीय कार्यक्रम स्वीकृत गरेका थिए। बहुवर्षीय कार्यक्रम पास भएलगत्तै त्यसै दिन निर्वाचन आयोगमा उजरी परेको थियो। उजुरी परेको सात दिनपछि गत बिहीबार आयोगले मन्त्रालयलाई बहुवर्षीय कार्यक्रम रद्द गर्न निर्देशन गरेको हो। तत्कालीन सहरी विकास सचिव सिंह यही मंसिर ५ गतेबाट ५ वर्षीय समयसीमाका कारण अनिवार्य अवकाश पाएका छन्। सिंहको अवकाशपछि मैनालीले निमित्त सचिव चलाएका छन्। सिंहले पास गरेका कार्यक्रमलाई मैनालील रद्द गरेका हुन्।
