काठमाडौँ, २६ जेठ । नेपाली कांग्रेसका नेता जगदिश्वरनरसिंह केसीले पार्टी सभापति शेरबहादुर देउवाले विधान मिचेर आफूखुसी मनलाग्दी गरेको आरोप लगाएका छन् ।
नेपाली कांग्रेसको रूपान्तरण अभियानका लागि सुदूरपश्चिम पुगेका नेता केसीले सो कुरा बताएका हुन् ।
सभापतिले विधान मिचेर आज क्रियाशील लिएको मान्छेले भोलि नै केन्द्रीय सदस्य बन्ने बाटो लिएको टिप्पणी गरे ।
‘सभापतिको नजिक भएपछि आज क्रियाशील सदस्य लिन्छ । उहाँले १० वर्ष प्रमाणित गर्दिनुहुन्छ भोलि केन्द्रीय सदस्य लड्छ । यस्तो अवस्था कहाँ छ ?’ उनले भने ।
नेता केसीले कांग्रेसको विधान मिचिँदै विधान नै नभएको जस्तो अवस्थामा पार्टी रहेको भन्दै कटाक्ष गरे । उनले पार्टीको केन्द्रीय कमिटी बैठक हरेक दुई दुई महिनामा बस्नुपर्ने भए पनि १० महिनायता बैठक बस्न नसकेको भन्दै सभापतिको आलोचना गरे ।
नेता केसीले पार्टी रुपान्तरणका लागि देशभरका कार्यकर्ताहरु उठ्नुपर्ने बेला आएको बताए ।
कांग्रेसको संस्थापन इतरले सुरु गरेको रूपान्तरण अभियान मधेस, बागमती, गण्डकी, कर्णाली हुँदै सुदूरपश्चिम पुगेको छ । सबै प्रदेशगत अभियान सकिएपछि जिल्ला र क्षेत्रगत अधिवेशन गर्ने तयारी गरिएको छ ।
