एजेन्सी । लगातार तीनवटा ओलम्पिकमा युगान्डाको प्रतिनिधित्व गरेका चर्चित एथ्लेटिक खेलाडी बेन्जामिन किप्लागाट केन्यामा मृत अवस्थामा फेला परेका छन् ।
स्थानीय सञ्चारमाध्यमका अनुसार उनमाथि छुरा प्रहार भएको छ । उनको छाती र घाँटीमा चक्कु प्रहार भएको बताइएको छ । सन् २०१२ को लण्डन ओलम्पिकमा ३ हजार मिटर स्टिपलचेजमा ३४ वर्षीय किपलेज सेमिफाइनलमा पुगेका थिए ।
केन्याको एल्डोरेट शहर नजिकै कारमा उनको शव फेला परेको थियो । यो स्थान खेलाडीहरूको शीर्ष प्रशिक्षण केन्द्र हो। केन्याली प्रहरीले उनको मृत्युबारे अनुसन्धान सुरु गरिएको जनाएको छ ।
