काठमाडौँ । पूर्वमा हात्तीले आतङ्क मच्चाएपछि त्यसको समाधान उपाय खोजीका लागि उच्चस्तरीय समिति बनाउने तयारी भएको छ । राष्ट्रिय निकुञ्ज तथा वन्यजन्तु संरक्षण विभागले उक्त प्रस्ताव वन तथा वातावरण मन्त्रालयमा लैजाने तयारी गरेको हो ।
विभागका प्रमुख डा सिन्धु प्रसाद ढुङ्गानाले पूर्वमा भारतीय हात्तीको बथान आएर वर्षेनी खेतीबारी सँगै धनजनको नष्ट गरेपछि त्यसको दीर्घकालीन समस्या समाधानका लागि उच्चस्तरीय समिति बनाउन आफैँ मन्त्रालयमा प्रस्ताव लैजाने बताए ।
उनले भने,‘ हात्तीले दुई जना मारिसक्यो, अहिले तत्कालै त्यहाँ जाँदा समस्या समाधान हुँदैन । बरु के कसरी समस्या समाधान गर्न सकिन्छ भन्नेबारे हामी छलफलमै छौँ ।’ उनका अनुसार हात्तीलाई भगाउने नाममा भएका गतिविधिले हात्ती थप रिसाएर मानववस्तीमा प्रवेश गर्दै आएका हुन् ।
हात्तीलाई कसैले पनि नजिस्काए उ आफ्नो बाटो लाग्ने ढुङ्गानाले बताए । अहिले ति हात्तीहरू महोत्तरी हुँदै पर्सा लागेका छन् । ‘ वन्यजन्तु पनि जोगाउनु पर्छ, मानववस्ती सँगै उनीहरूका अन्नपात जोगाउनुपर्छ, तर सजिलो छैन,’ ढुङ्गानाले रातोपाटीसँग भने,‘ हात्ती नेपाल प्रवेशमा रोक लगाउने बारे भारतसँग कूटनीतिक पहल थाल्नुपर्ने देखिन्छ ।’
