काठमाडौं । राजस्व अनुसन्धान विभागले 'क्रिप्टो करेन्सी'को कारोबार गरेको अभियोगमा दुई जनाविरुद्ध मुद्दा दायर गरेको छ ।
आज विभागले अभौतिक मुद्रा (क्रिप्टो करेन्सी यूएसडीटी कोइन)को कारोबार गरेको अभियोगमा झापाका शुभम कुमार यादव र रोहन चौधरीविरुद्ध १४ करोड बिगोको तीन गुणा (४२ करोड रुपैयाँ) सम्मको माग दाबी गरेर ललितपुर जिल्ला अदालतमा मुद्दा दायर गरेको हो ।
करिब पाँच महिनाको सुक्ष्म अनुसन्धानपछि उनीहरूविरुद्ध अभियोग दायर गरिएको विभागका महानिर्देशक नवराज ढुंगानाले बताए ।
विभागको अनुसन्धानबाट शुभमले ‘बनान्स एप’को प्रयोग गरी गरी क्रिप्टोको कारोबार गरेको खुलेको छ । उनले कारोबारको रकम राख्न तथा झिक्ने प्रयोजनका लागि उनकै साथी रोहनको खाता प्रयोग गर्ने गरेको अनुसन्धानबाट खुलेको छ ।
उनीहरूमाथि विदेशी विनिमय नियमित गर्ने ऐन, २०१९ को दफा १७ बमोजिमको सजाय माग दाबी गरी अभियोग दायर गरिएको महानिर्देशक ढुंगानाले बताए ।विभागले अधिकतम तीन वर्षको जेल सजायसहित पनि माग गरेको छ ।
