काठमाडौं । नेकपा एमालेकौ केन्द्रीय कमिटी बैठक मंगलबार शुरु हुँदैछ। बैठक ललितपुरको च्यासलस्थित पार्टी मुख्यालयमा बिहान ११ बजे शुरु हुनेछ।
एमाले प्रचार विभाग प्रमुख राजेन्द्र गौतमले केन्द्रीय कमिटी बैठकका लागि ६ वटा कार्यसूची तय भएको जानकारी दिए। उनका अनुसार बैठकमा अध्यक्ष केपी शर्मा ओलीले मुलुकको समसामयिक राजनीतिक परिस्थितिबारे सम्बोधन गर्नेछन्।
बैठकमा समग्र पार्टीको सांगठनिक कामको समीक्षा तथा पार्टीको शुद्धीकरण र सुदृढीकरण कार्यक्रमको अवधारणाबारे छलफल हुनेछ।
यसैगरी, कार्यसूचीमा पार्टी निर्माणमा देखिएका समस्या र समाधानका उपाय, जनपरिचालन र जनदबाबको ‘एजेण्डा’ तथा समसामयिक प्रस्ताव रहेका प्रचार विभाग प्रमुख गौतमले जानकारी दिए। बैठक बिहीबारसम्म बस्नेछ।
