वीरगन्ज । जिल्ला प्रशासन कार्यालय पर्साले वीरगन्जमा लगाएको कर्फ्यु पूर्ण रूपमा हटाएको छ। बुधवार राति १० बजेदेखि लागू हुनेगरी स्थानीय प्रशासनले कर्फ्यु हटाएको हो ।
प्रमुख जिल्ला अधिकारी दिनेशसागर भुसालले एक विज्ञप्ति जारी गर्दै स्थानीय प्रशासन ऐन २०२८ को दफा ६ (क) को उपदफा ५ बमोजिम कर्फ्यु हटाइएको जानकारी दिएका छन् । रौतहटको इसनाथ नगरपालिकामा मूर्ति सेलाउने विषयमा दुई समुदायबिच भएको झडपलाई लिएर वीरगन्जमा हिन्दु समाजका कार्यकताहरुले सोमबार प्रदर्शन गर्नुको साथै बजार बन्द गराएका थिए ।
यही क्रममा दुई समुदायबिच विवाद बढ्ने सम्भावनालाई मध्यनजर गर्दै जिल्ला प्रशासन कार्यालयले यही सोमबार साँझ ५ बजेदेखि अनिश्चयकालीन कर्फ्यु आदेश जारी गरेको थियो ।
