रुकुम/रुकुमको पीपल गाउँपालिका –९ बस्ने कौशिला दाहालले अहिले कुष्ठरोगको उपचार गराइरहनुभएको छ । बिगत १५ बर्षदेखि कुष्ठरोगको समस्या भए पनि समाजको डरले खुट्टाको घाउ लुकाएर बस्नुभयो ।
सहन नसकेपछि उपचार गर्न रुकुमको सदरमुकाम पुग्नुभयो । सदरमुकाममा कुष्ठरोग भएको थाहाँ भएपछि उहाँ थप उपचारका लागि अहिले आइएनएफद्वारा सञ्चालित बाँकेको जानकी गाउँपालिका –३ मानपुरमा रहेको साइनिङ अस्पतालमा उपचारत हुुनुहुन्छ । उहाँले कुष्ठरोग लागेको थाहाँ पाएपछि समाजले राम्रो व्यवहार नगरेको बताउनुभयो ।
यस्तै अर्का कुष्ठरोगका बिरामी अछामको तुर्माखाद गाउँपालिका –४ का बिजेश बुढाले पनि सोही अस्पतालमा बिगत १ महिनादेखि उपचार गराइरहनुभएको छ । भारतमा उपचारका क्रममा रोग लागेको थाहाँ पाएपछि उहाँ उपचारमा संलग्न हुनुहुन्छ । गाउँघरमा राम्रो व्यवहार नगर्ने र घरपरिवारले पनि सम्मान नगर्ने भएकाले राज्यले रोगजारीको ग्यारेन्टी गर्नुपर्ने उहाँले माग गर्नुभयो ।
उहाँले उपचार गरेर घर फर्किसकेपछि कसरी जिविकोपार्जन गर्ने भनेर समस्या भएको दुखेसो पोख्नुभयो । आज सो अस्पतालले बाँके र बर्दियाका पत्रकारसँग भेटघाट कार्यक्रम गरी कुष्ठरोगीको पछिल्नो अवस्थाबारे जानकारी गराएको छ । अस्पतालका कुष्ठरोग प्रमुख मंगलबहादुर थारुका अनुसार यो आर्थिक बर्षमा ६० जना कुष्ठरोगका नयाँ बिरामी फेला परेका छन् ।
अस्पतालले आज सञ्चारकर्मीसँगको भेटघाटमा अस्पताल प्रमुख थारुले चालु आर्थिक वर्ष २०८०–८१ को ६ महिनामा ६० जना कुष्ठरोगका बिरामी फेला परेको बताउनुभयो । अस्पतालले ८ हजार ६०२ जना बिरामी चेकजाँच गर्दा कुष्ठरोगीका ती बिरामी फेला परेका थिए । गत वर्षको सोही अवधीमा ५१ जना बिरामी फेला परेका थिए । गत वर्ष साउनदेखि असार महिनासम्म भने १२६ जना बिरामी फेला परेका थिए ।
चालु आर्थिक वर्षमा फेला परेका ६० जनामध्ये बाँकेबाट मात्र २९ जना कुष्ठरोगका बिरामी छन् । अरु बर्दिया, सुर्खेत, सल्यान र रुकुमका बिरामी हुन् । १५ जना भने भारतीय बिरामी रहेको पनि थारुले बताउनुभयो । २४ बेड क्षमताको डेडिकेटेड यो अस्पतालमा ६० जना कुष्ठरोगका बिरामीमध्ये ५३ जनालाई ५२ जनालाई भर्ना गरी उपचार गरिएको छ ।
