तुलसीपुर, १९ साउन । तुलसीपुर–४ बेतनी खोलामा आएको बाढीले अटो बगाउँदा बेपत्ता भएका दुई जना मध्ये एक जनाको शव फेला परेको छ । तुलसीपुर–४ खाद्रे निवासी ५५ वर्षीया सिता आलेको शव फेला परेको हो ।
आलेको शव शनिबार विहान ७ बजेको समयमा तुलसीपुर–१५ ग्वारखोलामा फेला परेको इलाका प्रहरी कार्यालय तुलसीपुरका प्रहरी निरीक्षक प्रकाश थापाले जानकारी दिए ।
मृतकको शव आफन्तले सनाखत गरेका थिए । शुक्रबार बेलुका तुलसीपुरबाट खाद्रे जाँदै गरेको रा१ह ४०५५ नम्बरको अटोलाई बेतनी खोलाले बगाएको थियो । अटोमा सवार पाँच जनामध्ये तीन जना खोलाबाट उत्रन सफल भएका थिए भने दुई जना बेपत्ता भएका थिए ।
अर्की बेपत्ता मञ्जु खड्काको खोजी कार्य जारी रहेको प्रहरीले बताएको छ ।
