वडामा भएका गतिविधिहरु सर्वसाधारणमा जानकारी गराउने उद्देश्यले तेस्रो आँखा डट कमले विभिन्न पालिकाहरुका वडा अध्यक्षहरुसँग पाँचवटा प्रश्नहरु सोध्ने अभियान चलाएको छ । सो अभियान अन्तर्गत आज हामीले तुलसीपुर उपमहानगरपालिका वडा नम्बर १० का वडाध्यक्ष यमराज केसीसँग पाँचवटा प्रश्नहरु सोधेका छौं । प्रस्तुत छ, वडाध्यक्ष केसीसँग तेस्रो आँखाकी संवाददाता रुपा थापाले गरेको कुराकानीको सम्पादित अंंश ।
१) जनतालाई चुनावको समयमा गरेका बाचाहरु मध्ये कति काम सम्पन्न भयो र कति काम हुन बाँकी छ ?
हामीले जनतालाई निर्वाचनको बेलामा थुप्रै आस्वासन दिएका थियौं, त्यो मध्ये करिब करिब आधा काम पूरा गरेका छौं । हाम्रो समयावदी पनि आधा सकिएको छ । अझै आधा काम गर्न बाँकी छ । जनताले अपेक्षा गरेका भौतिक पुर्वाधारका कुराहरूदेखि शिक्षा, स्वास्थ, खानेपानी, कुला, नालाहरुलाई समावेशी रुपमा विकास गरेका छौं । विकास गरेर सकिने चिज होईन, विकास जति गरेपनि नसकिने चिज हो, त्यसैले हामीले विकास निर्माणको कामलाई निरन्तरता दिँदै आएका छौं ।
२) वडाको समग्र गतिविधि सञ्चालन गर्दा जनताबाट निर्वाचित भएर आएका वडा सदस्यहरुलाई सहभागी गराईदैन भन्ने गुनासो सुनिन्छ । तपाईंको वडामा त्यस्तो छ कि छैन ?
यस्ता खालका गुनासोहरु अन्य वडामा होला तर हाम्रो हकमा यहाँ छैन । हाम्रो तीन जना वडा सदस्यहरु अहिले यहीँ हुनुहुन्छ । हामीले स(साना कुराहरूको निर्णय गर्दा पनि सदस्यहरुलाई सहभागी गराएर उहाँहरुको विचार, राय र सल्लाह बुझेर निर्णय लिने गरेका छौं । समानरूपमा सबैलाई समावेश गराएर योजनाहरु तर्जुमा गर्नेदेखि लिएर हरेक समस्याहरुको समाधान गर्न वडा सदस्यहरुको सरसल्लाह बाटै गर्छौं । हाम्रो वडामा प्रत्येक महिनाको एक पटक सदस्यहरुको बैठक बसेर छलफल गर्ने गरेका छौं ।
३) वडाको समग्र समृद्धिकालागि तपाईका भावि योजनाहरु के के छन ?
वडालाई एउटा समृद्ध वडा, विकाससँगै जोडिएको वडा बनाउन हरेक किसिमका कामहरु हामीले गरिरहेका छौं । त्यस मध्यमा यहाँको महत्त्वपूर्ण बिषय भन्नेको गौरी ताल हो । गौरीगाउँ ताललाई पर्यटकीय क्षेत्रको रुपमा रुपान्तरण गर्नुपर्छ भन्ने बिषयमा हामी निरन्तरलागि परेका छौं । अहिले गौरी तालको डिपिआर पनि तयार भईसकेको छ । पर्यटकीय स्थलको रुपमा रुपान्तरण गर्नलाई डिपिआर सम्पन्न भइसकेको छ । बजेट अझै पारित भएको छैन । बजेट कहाँबाट कसरी हाल्ने भन्ने बिषयमा हामीले माथिल्लो सरकारसँग निरन्तर रुपमा पहल गरिरहेका छौं । यो कार्य सम्बन्धि पहल एकदमै जारी छ ।
४) जनताको प्रतिनिधि र वडाध्यक्षको हैसियतले वडावासीहरुको जनगुनासो कतिको सुननुहुन्छ ?
जनताको जनप्रतिनिधि भइसकेपछि हरेक किसिमका गुनासो पनि यहि हुन्छन् र हरेक किसिमका आशाहरु पनि यहिँ हुन्छन् । गुनासोहरु किन आउछन भन्ने गुनासो पनि रहँदैन र रहने कुरा पनि भएन । आउछन गुनासोहरु र अपेक्षा पनि धेरै हुन्छन् । जहाँ जस्तो किसिमको परिस्थिति सृजना हुन्छ त्यस्तै किसिमले अगाडि बढिरहेका छौं । कतिपय गुनासो विकास भएन, कतिपय आठिसादिको बिषयमा, कतिपय पानी पधेरी र कतिपय लेनदेनको बिषयमा गुनासोहरु आउँछन । जनताका समस्या लिएर आउने ठाउँ भनेकै स्थानीय सरकार हो । स्थानीय सरकारको अभिभावक भइसकेपछि गुनासोहरु आउनुपर्छ र आइरहेका छन, हामीले जनताका गुनासोहरु सकेसम्म सम्बोधन हुने गरि काम गरी रहेका छौं ।
५) सन २०३० सम्म दिगो विकासका लक्ष्यहरु प्राप्त गरि सक्नुपर्ने समय सीमा छ । त्यस्को निमित्त तपाईंहरुको तयारी कस्तो छ ?
२०३० सम्म प्रत्येक किसानको खेतसम्म पानीको पहुँच पुर्याउने अभियानका साथ हामीहरु सिँचाइकोलागि अग्रसर भएर लागी परेका छौं । त्यसै गरि प्रत्येक किसानहरु समृद्धिसंग जोडनुपर्छ भनेर अहिलेदेखि एउटा कार्यक्रम लागू गरेका छौ । किसानसँग वडाध्यक्ष कार्यक्रमु भन्ने, त्यस्मा पानीको पहुँच पुर्याउनकोलागि निःशुल्क रुपमा पानी बितरण गर्नुपर्छ । जहाँ पानीको पहुँच ट्युवेलहरु, स्थालेट्युवेल र टुववोडिङहरु भएका ठाउँमा निस्शुल्क पानी वितरण गर्ने अभियानमा लागेका छौं । सबैभन्दा महत्त्वपूर्ण कुरा शिक्षा हो । शिक्षालाई प्रत्येक बालबालिकाको पहुँच पुर्याउनुपर्छ भन्ने उद्देश्यका साथ बिद्यालयलाई अनुदान, बिद्यालयको स्तर सुधार, शैक्षिक गुणस्तर सुधारका जस्ता कुराहरुमा पनि हामी लागी परेका छौं । त्यसैगरी अर्को महत्त्वपूर्ण कुरा स्वास्थ्य हो, स्वास्थ्यको बिषयमा पनि हामी निरन्तर रुपमा खटिएका छौं । यी यावत कुराहरुमा जोडिदै २०३० सम्म दिगो विकासको लक्ष्य पूरा गर्ने अभियानमा छौं ।
