काठमाडौँ २२ कात्तिक । इलेक्ट्रोनिक डाइभर्सिटी भिसा (ईडीभी) भर्न चाहनेहरूका लागि आज अन्तिम दिन रहेको छ । संयुक्त राज्य अमेरिकाको सन् २०२६ का लागि खुला गरेको ईडीभी आवेदन आजसम्म मात्र भर्न पाइने अमेरिकी राजदूतावासले जानकारी दिएको हो ।
ईडीभी भर्ने म्याद कात्तिक २० गतेसम्मका लागि थियो । यद्यपि २ दिन समय थप गरी कात्तिक २२ गते अर्थात् आजसम्म भर्न सकिने व्यवस्था गरिएको थियो । अमेरिकी दूतावासका अनुसार ईडीभीमा आज साँझ १०ः४५ बजेसम्म आवेदन दिन सकिने छ । नेपालबाट पनि ईडीभी अमेरिका जानेहरूको संख्या बढ्दो छ । यसपटक पनि ईडीभी भर्नेको संख्या उच्च रहेको बताइएको छ ।
प्रत्येक वर्ष अमेरिकन सरकार ईडीभी भिसामार्फत एशियाली देशबाट हजारौँ संख्यामा अमेरिका लैजाने गर्छ । यद्यपि एशियाली राष्ट्रका केही देशहरूले भने ईडीभी भर्न पाउँदैनन् । चीन, भारत, बंगलादेश, फिलिपिन्स, दक्षिण कोरिया लगायतका देशले ईडीभी भर्नका लागि स्वीकृति दिइएको छैन ।
उक्त अमेरिकन ईडीभी विश्वभरबाट प्रत्येक वर्ष ५० देखि ५५ हजार मान्छेलाई पर्ने गरेको तथ्याङ्कले देखाउँछ । नेपालबाट पनि प्रत्येक वर्ष ठूलो संख्यामा ईडीभी परेर अमेरिका गइरहेको देखिन्छ ।
