काठमाडौँ, २८ कात्तिक । खानेपानीमन्त्री प्रदीप यादवले महिला सशक्तीकरणका अभियानलाई बिस्तार गर्ने योजनामा सरकार रहेको बताउनु भएको छ ।
बुधवार वीरगञ्जमा आयोजित वीरगञ्ज महानगरपालिकाले १० हजार भन्दा बढी किशोरीहरूलाई आत्मरक्षाका लागि दिएको तालिमको उद्घाटन कार्यक्रममा बोल्दै उहाँले महिला सशक्तीकरणका अभियानलाई बिस्तार गर्ने योजनामा सरकार रहेको बताउनु भएको छ ।
उहाँले वीरगञ्ज महानगरपालिकाले सुरु गरेको अभियान सुरुवात मात्रै भएको भन्दै अन्य जिल्लाहरूमा पनि किशोरीहरूका लागि आत्मरक्षाको कार्यक्रम अघि बढाउँदै लैजाने बताउनु भएको हो । किशोरीहरूको सशक्तीकरणको लागि तालिम कार्यक्रमहरू सञ्चालन गर्न सरकारले अब ढिला नगर्ने बताउनुभयो ।
मन्त्री यादवले यस्ता तालिमहरूले जीवनमा आत्मबल, आत्मविश्वास बढाउने, शारीरिक र मानसिक रूपले बलियो बनाउने र हिंसाजन्य गतिविधि भए प्रतिकार गर्न सिकाउने बताउनु भएको हो । महानगरपालिकाले एकसाथ १० हजार भन्दा बढी किशोरीलाई आत्मरक्षाको तालिम दिएर विश्व रेकर्डसहित गिनिज बुकमा धेरै किशोरीलाई एक साथ तालिम दिएर महानगरको नाम लेखाउने तयारीअनुसार तालिम कार्यक्रम आयोजना गरिएको हो ।
