काठमाडौँ, असार १७ । नेपाल चिकित्सक सङ्घले मङ्गलबारबाट आन्दोलनका कार्यक्रम घोषणा गरेको छ ।
उपभोक्ता अदालतले हालै चिकित्सकीय अभ्याससम्बन्धी मुद्दामा सुनाएको फैसलाहरू नेपाल मेडिकल काउन्सिल अधिकार क्षेत्रसँग बाझिएकोमा आपति जनाउँदै सङ्घले चरणबद्ध आन्दोलन घोषणा गरेको हो ।
नेपाल चिकित्सक सङ्घले विज्ञप्ति निकाल्दै चिकित्सकले उपचारको क्रममा त्रुटी भएमा उजुरी हेर्ने जिम्मेवार संस्थाको रूपमा नेपाल मेडिकल काउन्सिल रहेकोले यस्ता मुद्दाहरू काउन्सिल मार्फत नै अगाडि बढाउनुपर्ने माग राखेको छ ।
सङ्घले उपभोक्ता संरक्षण ऐन, २०७५ मा आवश्यक संसोधनका लागि दबाब दिन मङ्गलबारदेखि ७२ घण्टाका लागि देशभरका सम्पूर्ण चिकित्सक तथा स्वास्थ्यकर्मीद्वारा हातमा कालो पट्टि बाँधी सेवा प्रभाव गर्ने निर्णय गरेको छ ।
दबाबका कार्यक्रममा उचित समन्वय गर्नका लागि सङ्घका महासचिव डा।सन्जिव तिवारीको संयोजकत्वमा टाक्स फोर्स गठन गरेको छ ।
सङ्घले सरकार अन्तर्गतका विभिन्न सरोकारवाला निकायसँग यस विषयमा निरन्त छलफल अगाडि बढाई समाधानका लागि दबाब दिने कार्यक्रम तय गरेको छ ।
असार १९ गते सम्पूर्ण सरोकारवालाहरूलाई बृहत् छलफल गरी आगामी कार्यक्रम निर्धारण गर्ने निर्णय सङ्घले गरेको छ ।
यदि सरकारले यस विषयमा यथाशीघ्र उपयुक्त कदम नचालेमा चिकित्सक सङ्घ सशक्त आन्दोलनका कार्यक्रम घोषण गर्न बाध्य हुने चेतावनी दिएको छ ।
