जङ्गली क्षेत्रबाट तीव्र गतिमा आएको वर्षे भलले बिहान पौने ८ बजेदेखि लोकमार्ग अवरुद्ध भएको इलाका प्रहरीका डिएसपी विकास बमले जनाउनुभयो ।
वर्षे भलले करिब ३० फिट सडक कटान गर्नुका साथै लचकामा रहेकोे ह्युमपाइपसमेत बगाएपछि दुईतर्फी आवागमन ठप्प छ ।
जङ्गली क्षेत्रमा अलपत्र यात्रु तथा सवारी पानीको बहाव कम हुने प्रतीक्षामा छन् ।
कटान क्षेत्रमा बिहानैदेखि बर्दीबास ट्राफिक निरीक्षक लक्ष्मीराज जोशीसहितका प्रहरीले सवारी व्यवस्थापनका प्रयास गरिरहे पनि मौसम प्रतिकूल भएकाले कतिबेला आवागमन सुचारु हुने हो अनिश्चित छ ।
पानीको बहाव तत्काल कम हुने अवस्था नदेखेपछि हतारमा रहेका कतिपय सवारी गौशाला रोड हुँदै करिब ४० किलोमिटर घुमाउरो बाटो भएर पूर्वपश्चिम लोकमार्गको लक्ष्मिनियाँ चोकबाट गन्तव्यतर्फ गएको डिएसपी बमले बताउनुभयो ।
कटान क्षेत्र नजिकै निर्माणाधीन कल्भर्टका ठेकेदार चाइनिज ठेकेदार शान्ति तथा रसुवागढी ज्वाइन्ट भेन्चरले हतारमा रहेका पैदल यात्रुलाई डोजरमा बोकेर सडक वारपार गराइरहेको छ ।
सोही ठेकेदार कम्पनीले जङ्गली भलले बगाएर लगेको लचकाको ह्युमपाइपलाई जोडजाड गरी बाटो खुलाउने प्रयास गरिरहेको छ ।
