काठमाडौँ, जेठ २५ गते । जल तथा मौसम विज्ञान विभाग अन्तर्गत मौसम पूर्वानुमान महाशाखाका अनुसार सोमबार (आज) राति देशका विभिन्न स्थानमा वर्षा हुने सम्भावना छ ।
महाशाखाका अनुसार राति कोशी, मधेस, बागमती, गण्डकी, लुम्बिनी, कर्णाली र सुदूरपश्चिम प्रदेशको हिमाली तथा पहाडी भूभागको एक, दुई स्थानमा मेघगर्जन चट्याङ्गसहित हल्का वर्षा, हिमपातको सम्भावना छ ।
अहिले कोशी, बागमती, गण्डकी र लुम्बिनी गरी चार प्रदेशका थोरै स्थानमा मेघगर्जन चट्याङ्गसहित हल्कादेखि मध्यम वर्षा भइरहेको छ ।
भोलि मङ्गलबार कोशी, मधेस, बागमती र लुम्बिनी प्रदेश लगायत देशको हिमाली र पहाडी भूभागमा साधारणतया तथा सुदूरपश्चिम प्रदेशको तराईमा आंशिक बादल लाग्नेछ ।
पर्सी बुधबार कोशी प्रदेश लगायत देशको हिमाली र पहाडी भूभागमा साधारणतया र तराई भूभागमा आंशिक बादल लाग्नेछ ।
भोलि र पर्सी बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानमा तातो दिन हुने तथा गर्मी बढ्ने महाशाखाले पूर्वानुमान गरेको छ ।
