सोलुखुम्बु ११ साउन । सोलुखुम्बुको अप्पर सोलु हाइड्रोपावरको हेडबक्स नजिकैको सोलुखोलामा बेवारिसे शव भेटिएको छ । सोलुदुधकुण्ड नगरपालिका ६ छुल्यामु स्थित सोलुखोलामा महिलाको जस्तो देखिने शव बुधबार विहान फेला परेकोे जिल्ला प्रहरी कार्यालय सोलुखुम्बुले जनाएको छ ।
हाइड्रोपावरका प्राविधिकले खोलामा सडिन लागेको अवस्थामा शव देखेपछि प्रहरीलाई खबर गरेका थिए । शवको उद्धारका लागि जिल्ला प्रहरी कार्यालय सोलुखुम्बुबाट प्रहरी निरीक्षक राम किशोर शाहसहितको टोली घटनास्थल पुगेको छ ।
यद्यपी शव सड्न लागेकाले पहिचानमा समस्या भएको अस्थायी प्रहरी चौकी दोर्पुका इन्चार्ज प्रहरी सहायक निरीक्षक श्याम नारायण यादवले बताए ।
उक्त शव झण्डै एक महिना अघि सोलुदुधकुण्ड नगरपालिका ४ बाट बेपत्ता भएका रङ्गे विश्वकर्माका श्रीमती शषीकला राईको हुन सक्ने प्रहरीको अनुमान छ ।
यसैगरी झापाको झापाको बुद्धशान्ति गाउँपालिका–६ मा पौडी खेल्ने क्रममा एक बालकको डुबेर मृत्यु भएको छ ।
बुद्धशान्ति–४ का चन्द्र मावोको १२ बर्षीय छोरा इचिहाङ मावो कुलोको पानीमा पौडी खेल्ने क्रममा अचानक पानीमा डुवी मृत्यु भएको हो ।
मृतक बालकको शवलाई पोष्टमार्टमको लागि मेची अस्पताल पठाएको र घटना सम्वन्धमा इलाका प्रहरी कार्यालय काँकरभिट्टाबाट अन्य थप अनुसन्धान भईरहेको छ ।
