तेस्रो आँखा
काठमाडौं, १६ भदौ । नेकपा (एमाले) परित्याग गरी सुुदुरपश्चिम प्रदेशका सांसद रतन थापालगायतका नेताहरु रेशम चौधरीको नागरिक उन्मुक्ति पार्टी प्रवेश गरेका छन् ।
काठमाडौंमा बिहीबार आयोजित पार्टी प्रवेश कार्यक्रममा एमाले कैलालीका पूर्व अध्यक्ष तथा प्रदेशसभा सदस्य थापासहित सांसद परियार चौधरी, सुदुरपश्चिम प्रदेशका निवर्तमान सांसद हिमाञ्चलराज भट्टराई पनि नागरिक उन्मुक्ति पार्टी प्रवेश गरेका हुन् । त्यस्तै डा.प्रदीप भट्टराई, तेजराम चौधरी, नेपाल समाजवादी पार्टी केन्द्रीय सदस्यहरु राजेन्द्र देवकोटा, राजाराम चौधरी, लक्ष्मीराम चौधरीलगायत नेताहरुपनि पार्टी प्रवेश गरेका छन् ।
उनीहरुलाई पार्टीकी अध्यक्ष रञ्जिता श्रेष्ठ चौधरीले खादा, र अविर लगाएर पार्टीमा स्वागत गरिन् । पार्टीकी अध्यक्ष रञ्जिता श्रेष्ठ चौधरीले नागरिक उन्मुक्ति पार्टीको स्थापना महत्वपुर्ण परिस्थितिमा भएको र आफूहरु पार्टी स्थापनाको उद्देश्यअनुसार नै सही तवरले अघि बढेको स्पष्ट पारिन् । उनले पछिल्लो समय पार्टीप्रति जनताको उभार आएको सने दाबी गरिन् । उनले समावेशी, समानता, शुसासन, संघियता र पहिचानमा प्रतिवद्ध भई नेपालको लोकतान्त्रिक आन्दोलन र लोकतान्त्रिक मुल्य र मान्यताप्रति पार्टी प्रतिबद्ध भएको समेत स्पष्ट पारिन् ।
त्यस्तै नवप्रवेशी रतन थापाले जनताको भाग्य र भविष्य निर्माण गर्ने आशाले आफूले एमालेमा २२ वर्ष बिताएको भएपनि एमालेले देश र जनताको राम्रो काम गर्न नसकेको गुनासो पोखे । एमालेकै विभिन्न कारणले पार्टी छाड्न बाध्य भएको सुनाउँदै उनले जनताको सेवा जुनसुकै पार्टीमा बसेर गर्न सकिने उल्लेख गर्दै आफू जनताकै सेवाको लागि नागरिक उन्मुक्ति पार्टी प्रवेश गरेको स्पष्ट पारे । उनले एमालेमा धनाढ्य व्यक्ति आए अहिले नै नेता बन्ने र निर्वाचनको टिकट पाइहाल्ने अवस्था रहेको भन्ने आरोप लगाए ।
