काठमाडौं । राप्रपा नेपालका अध्यक्ष कमल थापाले आगामी चुनावका लागि नेकपा एमालेसँग तालमेल हुने बताएका छन् ।
सप्तरी सदरमुकाम राजविराजमा बिहीबार पत्रकारसँग कुराकानी गर्दै अध्यक्ष थापाले तालमेलका लागि एमालेका नेतासँग कुराकानी भइरहेको बताए । केही सिटमा एमालेसँग तालमेल हुने उनले बताएका छन् । यस्तै थापाले सबै प्रतिनिधि र प्रदेश सभा क्षेत्रमा आफ्ना उम्मेदवार खडा गर्ने जानकारी दिए ।
पार्टी निर्माण भएको ६ महिनामै आफ्नो पार्टी ७७ जिल्लामै गठन भइसकेको बताउँदै उनले आफूले हिन्दु राष्ट्रको एजेन्डा नछोडेको बताए । हिन्दु राष्ट्रकै निम्ति आफूहरू लड्दै आएको र अहिले पनि त्यो एजेन्डाकै लागि काम गरिरहेको बताए ।
