काठमाडौं । काठमाडौं महानगरपालिकाका मेयर बालेन्द्र शाहले डेङ्गी विरुद्ध टोल टोल वा सामूदायीकरुपमा नै सक्रिय भएर लाग्न अपिल गरेका छन् । सामाजिक संजालमा एक पोष्ट गर्दै उनले यस्तो अपिल गरेका हुन् ।
उनले डेङ्गी भएको शङ्का लागेमा ११८० नम्बरमा फोन गरी स्वास्थ्यकर्मीबाट परामर्श लिन सकिने बताएका छन् । मेयर शाहले काठमाडौं महानगरपालिकाले डेङ्गी संक्रमितका लागि २४ घण्टे हटलाइन सेवा सुरु भएको जानकारी दिँदै सङ्क्रमितले आवश्यक भएमा १०२ नम्बरमा फोन गरेर निस्शुल्क एम्बुलेन्स सेवा समेत लिन सकिने बताउका छन् ।
यसैबीच, डेङ्गी तीव्र रुपमा फैलिएपछि काठमाडौंको बुढानीलकण्ठ नगरपालिकाले आउँदो असोज ३ गते परेको संविधान दिवसको अवसर पारेर ‘स्टप डेङ्गी’ अभियान सञ्चालन गर्ने भएको छ ।
टोल सुधार समिति र महिला समूहको सक्रियतामा ‘स्टप डेङ्गी’र‘लामखुट्टे भगाऔँ, डेङ्गु हटाऔंँ’ अभियान सञ्चालन गर्न लागेकाले सबैलाई सहभागी हुन महानगरपालिकाले अनुरोध पनि गरेको छ । काठमाडौं उपत्यकासहित देशभर डेङ्गीको संक्रमण फैलिएको छ । अझै दुई महिना डेङ्गीको उच्च जोखिम रहेकाले लामखुट्टे नियन्त्रणमा जोड दिइएको छ । लामखुट्टेको टोकाइबाट जोगिन विज्ञले आग्रह गर्दै आएका छन् ।
