काठमाडौं । प्रतिनिधिसभाको शुक्रबारको बैठकमा सांसद कमल रोक्काले उत्तरगंगा जलविद्युत् आयोजना निर्माणका लागि पटकपटक प्रक्रिया अगाडि बढाउन आग्रह गरिए पनि सुनुवाइ नभएको बताएका छन् । उनले ढोरपाटन सिकार आरक्षलाई कुनै पनि समस्या नपर्ने गरी सो आयोजना तत्काल अगाडि बढाउन ऊर्जा, जलस्रोत तथा सिँचाइ मन्त्रालयको ध्यानाकर्षण गराए ।
८२८ मेगावाट क्षमताको आयोजना अहिले अध्ययनका क्रममा छ । आयोजनाबाट निकास हुने पानीका विषयमा कुरा नमिल्दा प्रक्रिया अगाडि बढ्न सकेको छैन । केहीले आयोजनाबाट निकास हुने पानी बागलुङतर्फ नै खसाल्नुपर्ने धारणा राख्नछन् । धेरैले सो आयोजनाको पानी हाल उत्तरगंगा नदीकै प्राकृतिक बहावअनुसार बग्न दिनुपर्ने बताउँछन् । त्यस्तै सांसद रोक्काले ढोरपाटन सिकार आरक्षबाट स्थानीय बासिन्दाले लाभ लिने वातावरण बनाउनुपर्ने बताए ।
सांसद खेमप्रसाद लोहनीले बूढीगण्डकी जलविद्युत् आयोजनाबाट प्रभावितको क्षतिपूर्ति, मुआब्जा, पुनर्बास र पुनःस्थापनाको काम बाँकी नै रहेको भन्दै सरकारको ध्यानाकर्षण गराए । सांसद गजेन्द्र महतले सिंगो कर्णालीलाई पाल्न सक्ने राराताल तथा त्यस क्षेत्रमा फैलिएको निकुञ्जलाई पूर्वतर्फ स्थानान्तरण गर्न आग्रह गरे ।
