काठमाडौं, २९ मंसिर । लोकतान्त्रिक समाजवादी पार्टी(लोसपा)को अबरोधपछि प्रदेश २ को बैठक स्थगित भएको छ । प्रदेश सभामा प्रदेश नम्बर २ सरकारको तर्फबाट समाजिक विकासमन्त्री नवल किशोर साहले अध्यादेश प्रस्तुत गर्न खोजेपछि लोसपाका सांसदहरु उभिएर विरोध गरेका थिए । बैठक १५ मिनेटलाई स्थगित भएको छ ।
सरकारले प्रदेश सभालाई छलेर ल्याएको प्रदेश कृषि विश्वविद्यालय अध्यादेश र प्रदेश प्राविधिक विश्वविद्यालय अध्यादेशको उद्देश्य प्रष्ट नरहेको भन्दै लोसपाका प्रदेश सांसदहरुले बैठक अवरुद्ध गरेका हुन् ।
सभामुख सरोजकुमार यादवले समाजिक विकासमन्त्री साहलाई अध्यादेश प्रस्तुत गर्न अनुमति दिएपछि लोसपा संसदीय दलका सचेतक परमेश्वर साहले उभिएर बैठकमा अध्यादेश प्रस्तुत हुन नदिने बताएका थिए । अध्यादेश फिर्ता नभएसम्म बैठक चल्न नदिने लोसपाले अडान लिएको छ ।
