काठमाडौं, २९ मंसिर । नेपाली कांग्रेसको १४ औं महाधिवेशन अन्तर्गत आज उपसभापतिको मतगणना हुनेभएको छ । कांग्रेस केन्द्रीय निर्वाचन समितिको बैठकले बेलुका ५ बजेपछि उपसभापतिको मतगणना गर्ने सहमति गरेको केन्द्रीय निर्वाचन समिति सचिव केशव रिजालले बताए ।
यसअघि समिति आजै मतगणना गर्ने कि भोली बिहानदेखि सुरुगर्ने अन्यौलमा थियो । उपसभापतिको मतगणना पार्टी कार्यालय सानेपामा हुने छ । अहिले मतगणनाको तयारी भइरहेको निर्वाचन समितिले जनाएको छ । भोली महामन्त्रीको मतगणना सुरुगर्ने समितिले जनाएको भनाइ छ । समितिले राति दस बजेसम्म उपसभापतिको मत परिणाम आउने बताएको छ ।
भोली महामन्त्रीको मत परिणाम आएपछि सहमहामन्त्री र केन्द्रीय सदस्यको मत गणना हुने सचिव रिजालले जानकारी दिए । गत सोमबार उपसभापति लगायत पदाधिकारी र केन्द्रीय सदस्यका लागि मतदान भएको थियो । सबै मतपत्र पार्टी कार्यालय सानेपामा राखिएको छ ।
