काठमाडौं । नेकपा एमालेका अध्यक्ष केपी शर्मा ओलीले श्रीमती राधिका शाक्यसहित राष्ट्रपति विद्यादेवी भण्डारीसँग टीका तथा जमरा लगाएका छन् ।
गृह जिल्ला झापामा बिहान ११ बजेर ५१ मिनेटको शुभ साइतमा पिता मोहनप्रसाद ओलीको हातबाट टीका ग्रहण गरेका ओली राष्ट्रपतिको हातबाट टीका लगाउन शीतल निवास पुगेका थिए ।
मुख्य राजनीतिक दलका नेतामध्ये ओली मात्र राष्ट्रपतिका हातबाट टिका लगाउन पुगेका हुन् । प्रधानमन्त्री शेरबहादुर देउवाले भातृ शोकका कारण टीका लगाएनन् भने पूर्व प्रधानमन्त्री पुष्पकमल दाहाल प्रचण्डले कहिल्यै पनि कसैसंग गएर टिका लगाउने गरेका छैनन् । अन्य शिर्ष नेताहरु पनि कोही राष्ट्रपतिसंग टिका लगाउन नआएको राष्ट्रपति कार्यालयले जनाएको छ ।
यसैबीच, राष्ट्रपति भण्डारीले सर्वसाधारण र उच्च पदस्थ अधिकारीलाई टीका लगाइदिएकी छन् । बुधबार सितलनिवासमा राष्ट्रपति भण्डारीले आम सर्वसाधारण तथा उच्च पदस्थ अधिकारीलाई दसैँको उपलक्ष्यमा टीका लगाइदिएकी हुन् ।
