दाङ,कात्तिक ११ । आसन्न प्रतिनिधिसभा तथा प्रदेशसभा निर्वाचनका लागि सत्ताधारी दलहरु गठबन्धन बनाएर चुनावी मैदानमा होमिएका छन् । विभिन्न दलगत भागवण्डाका आधारमा उम्मेदवारी बिभाजन गरेर चुनावी मैदानमा उत्रिएका गठबन्धनमा आवद्ध दलहरुले आगामी निर्वाचनमा बलियो सहकार्य निर्माण गर्ने अठोट समेत गरेका छन् । तथापी गठबन्धन कार्यान्वयनको पाटो कति बलियो होला भन्ने प्रश्न पनि संगसंगै उब्जिएकै छ । एकले अर्को दलको अस्तित्वलाई स्वीकार गरेर अघि बढ्ने योजना पेचिलो हुने लख काटिएकै छ । तथापी गठबन्धनमा आवद्ध उम्मेदवारहरुले भने गठबन्धन कार्यान्वयनमा कुनै आशंका नरहने दाबी गर्छन् । अहिलको निर्वाचन दलहरु बिचको हारजीतको लडाईँ भन्दा पनि राष्ट्रियता जोगाउने र भत्काउने शक्तिहरु बिचको लडाईँ भएको भन्दै गठबन्धनका उम्मेदवारहरुले आगामी निर्वाचनमा राष्ट्रियताको पक्षमा जनमत उभिने दाबी गरिरहेका छन् । 
गठबन्धनका तर्फबाट दाङ २ की प्रतिनिधिसभा सदस्य उम्मेदवार रेखा शर्माले आगामी निर्वाचनमा गठबन्धन कार्यान्वयनमा कुनै आशंका नरहने दाबी गर्छिन् । उनले गठबन्धनको बलियो कार्यान्वयनका लागि तल्लो तह सम्मकै कार्यकर्ताहरु सकृय भएर लागेको बताईन् । ‘सबै मतदाताहरुलाई अहिलेको गठबन्धनको आवश्यक्ता बोध हुन आवश्यक छ,’ उनले तेस्रो आँखासंग भनिन् ‘यो सन्देश आम मतदाताहरु समक्ष पुगिरहेको पनि छ, र आगामी निर्वाचनमा गठबन्धनको मत बाहिर कतै जाने छैन ।’
गठबन्धनको बलियो कार्यान्वयनका लागि यसमा अवद्ध दलका नेता तथा कार्यकर्ताहरु तल्लो तह सम्मै सकृय रहेको भन्दै दलहरुले चुनावी अभियानका कार्यक्रमहरुमा समेत सहकार्यको वातावरण निर्माण गरिएको समेत बताएका छन् । ‘चुनावी अभियान अन्तर्गतका कार्यक्रमहरु तल्लो तह सम्मै गठबन्धनमा आवद्ध दलका नेता तथा कार्यकर्ताहरुको संयुक्त सहभागीतामा भैरहेका छन्,’ दाङ क्षेत्र नम्बर १ का प्रतिनिधिसभा सदस्य उम्मेदवार मेटमणी चौधरीले भने ‘यो सहकार्यले मन माझ्ने काम पनि भैरहेको छ ।’ संघीय सरकारका सहरी विकास मन्त्री चौधरी नेकपा एकीकृत समाजवादीका तर्फबाट गठबन्धनका साझा उम्मेदवार हुन् । 
दाङ २ ख का प्रदेशसभा सदस्य उम्मेदवार तथा कांग्रेस लुम्बिनी प्रदेशका प्रवक्ता प्रचण्ड न्यौपानेले आगामी निर्वाचनमा गठबन्धनका बिचमा कुनै तुष कायम नरहने दाबी गरे । स्थानीय तहको निर्वाचनमा सामान्य केहि असन्तुष्टि देखिएको भएपनि आगामी निर्वाचनमा त्यो असन्तुष्टि कायम नहुने उनको भनाई छ । ‘स्थानीय तहको निर्वाचनमा आकांक्षीहरु धेरै हुने भएकाले थोरै असन्तुष्टिहरु देखिनु स्वाभाविक हो,तर अहिलेको निर्वाचन स्थानीय तहको निर्वाचन हैन,’ न्यौपानेले भने ‘यो निर्वाचन संविधानको रक्षा गर्नेहरुकै पक्षमा हुने छ,मतदाताहरुले संविधान मास्न खोज्नेहरुलाई चिनिसक्नु भएको छ ।’
यसैगरि दाङ २ क का प्रदेशसभा सदस्य उम्मेदवार राजु खनालको तर्क पनि गठबन्ध कार्यान्वयनमा कुनै आशंका नरहने भन्ने नै छ । बिपक्षी दलका उम्मेदवारहरुले गठबन्धन कार्यान्वयनलाई बिफल बनाउनका लागि नकारात्मक प्रचारहरु गरेको भएपनि गठबन्धनमा आवद्ध दलका नेता तथा कार्यकर्ताहरु गठबन्धन कार्यान्वयनमा प्रतिवद्ध भैसकेको उनको भनाई छ । ‘गठबन्धनमा आवद्ध दलका बिचमा तिक्तता फैलाउने काम बिपक्षीहरु बाट नभएक हैनन्,’ उनले भने ‘तथापी संविधान मास्न खोज्ने ति शक्तिहरुलाई मतदाताहरुले राम्रोसंग चिनिसकेको अवस्था छ, फलतः आगामी निर्वाचनमा गठबन्धनको जीत सहज छ ।’