तेस्रो आँखा डेस्क
दाङ,पुस ८। राप्रपाका महामन्त्री धवल शमशेर राणाले राप्रपालाई जनताको पार्टी बनाउनका लागि कमल थापाको बहिमर्गन गरिएको बताएका छन् । अहिले सम्म राप्रपा नेताको मात्रै पार्टी भएको भन्दै राणाले जनताको पार्टी बनाउनका लागि नेतृत्व परिवर्तन गरिएको बताए । दाङ तुलसीपुरमा आयोजित सभामा बोल्दै राणाले भने ‘राप्रपालाई जनताको पार्टी बनाउनका लागि नेतृत्व परिवर्तन गरिएको हो, अहिले राप्रपा जनताको पार्टी बनेको छ ।’
राप्रपाको मुलुकका लागि सोच्ने शैली अब फेरिएको भन्दै राणााले यसअघि नेताको खल्तीबाट नेता बनाउने परिपाटीको अन्त्य भएको उनको भनाई छ । ‘राप्रपाका कार्यकर्ता तथा नेताहरु सिमित नेताका खल्तीबाट जन्माईए,’ उनले भने ‘यो परिपाटीको अन्त्य गरिएको छ, राप्रपाको सोच्ने शैली अब फेरिएको छ ।’
यसैगरि उनले मुलुकमा हिन्दु राष्ट्र कायम गर्न र राजसंस्था फिर्ताका लागि राप्रपाका अगाडी दुइ बिकल्प रहेको बताए । ‘एउटा यि दुई मुद्धा स्थापित गर्न नागरिक आन्दोलनको जरुरी हामीले देखेका छौँ,’ उनले भने ‘अर्को भनेको निर्वाचन हो ।’
उनले राजसंस्था फिर्ताका लागि र हिन्दु राष्ट्र कायम गर्नका लागि राप्रपाले देशब्यापी आन्दोलन गर्न सक्ने भन्दै उक्त आन्दोलनमा सहभागी हुन आम नेपालीहरुलाई सहभागी हुन आग्रह गरे । यसैगरि आगामी निर्वाचनमा राप्रपाको जीत सुनिश्चित गरेर यि दुई मुद्धालाई मुलुकमा स्थापित गर्न सकिने बताए ।
