काठमाडौं । पछिल्ला केही महिनायता डेंगी र स्क्रब टाइफसको संक्रमण सँगसँगै देखिइरहेको छ ।
यो वर्ष अक्टोबर अन्तिमसम्म डेंगी संक्रमितको संख्या ४४ हजार नाघेको छ । जाडोयाम सुरु भएपनि डेंगीको जोखिम कायमै रहेको विज्ञहरू बताउँछन् । गतवर्ष सन् २०२२ मा कुनैपनि महिनामा डेंगी शून्यमा झरेको थिएन ।
सँगसँगै देखिँदै डेंगी र स्क्रब टाइफस
इपिडिमियोलोजी तथा रोग नियन्त्रण महाशाखा (ईडीसीडी)को तथ्यांकअनुसार जनवरीयता १ नोभेम्बरसम्म ४४ हजार ८४ जना संक्रमित भएका छन् । डेंगीका कारण जुलाईयता २० जनाको मृत्यु पुष्टि भएको छ ।
सन् २०२२ मा ५४ हजार ७८४ जना डेंगी संक्रमित भएका थिए । ८८ जनाको डेंगीबाट मृत्यु भएको ईडीसीडीको तथ्यांक छ ।
यही अवधिमा तीन हजार ९०० जनामा स्क्रब टाइफस संक्रमण देखिएको छ । हालसम्म मृत्यु भने पुष्टि भएको छैन । ईडीसीडीका किटजन्य रोग शाखा प्रमुख डा. गोकर्ण दाहालका अनुसार २०७२ सालको भूकम्पपछि स्क्रब टाइफस संक्रमितको संख्या बर्सेनि बढ्दै गएको छ । गतवर्ष तीन हजार ५०० जना संक्रमित भएका थिए ।
