अञ्जना चौधरी,तुलसीपुर २० पुस/ तुलसीपुर उपमहानगरपालिकाक उपमेयर स्यानी चौधरी ह स्कुल पहर्ना ब्याला बरा संर्घष कर पर्लिन । उ ब्याला कउनो कउनो केल थारुनके छाई छावा स्कुल जाइट । छावनके ठाउँम छाई हुकन पह्रर्ना ट झन समस्या रह । स्यानीके डाडु दिदीहुक्र कौने फे स्कुलके अंगना फे ट्याक नी पैल । स्यानी भर छोटिहसे पहरख जागिर खैना सोच बनैली ।

मनम पहर्ना बिचार रलसे फे स्यानीह स्कुल जाख पहर्ना लिरौसी निरलिहिन । घरपर्यार के मनै फे स्यानीह स्कुल जाई नि डेहिन । स्यानी एक दिन स्कुल गैलसे दुई दिन घरके काम करिट । स्यानीके घरक मनै फे स्यानीह स्कुल जाए निडेना कैख घरम ढन्ढा बठा छोर्डिहिन । उहफे स्यानी घरक सक्कु ढन्ढा कैख स्कुल जाइट । स्यानी आपन घरक मनैन से नुक्खे डाडु हुकनके सट वा पाईन्ट लगाख स्कुल जाइट । स्यानी आपन घरसे कापी कलम किताव स्कुल ड्रेस किन्ना पैसा फे नि पाइट ।

स्कुलम जाई भिरल पाछ स्यानी स्कुलम हुइना खेलकुदके कार्यक्रम भाग लिहट व  खेल जिट्खे पैलक पैसाले कापी कलम, किटाब किन्ना करिट । पाछ पाछ भर घरम भैसिनके दुख अप्नहे बेच्ख अइलक पैसाले कापी कलम किनट । कभुकाल ट उह पैसाफे नि पुगिन ट डाईक गोन्ड्री बेच्लक रुप्याँ चोर्ख फे किटाब कापी किनख पहर्लक स्यानी बटोइठी । 

१७ वर्षके उमेरम २०४७ सालम स्यानी उरहरी स्कुलसे एसएलसी पास कर्ली । आईए ओ बिए तुलसीपुरके राप्ती बबई क्याम्पस मसे पास कर्ली । समाजशास्त्र विषयमसे काठमाडौैके सगरमाथा क्याम्पससे एमएड पास कर्ली । स्यानी क्याम्पस पहर्टी बेस संस्थाम फे जागिर खैली उह जागिर खैना ब्याला स्यानी २०५१ सालम जापानम जाख पहर्ना मौका पैली । दुई वर्ष जापानम पहरल पाछ नेपाल आख स्यानी १२ वर्षसम फे वेस संस्थाम काम कर्ली ।

स्यानी अपने फे पहर्टी जागिर खैटी समाज सेवाके कामह फे संगसंग लैगिली । समानटाक लाग वकालत कर्टी जैना व्याला ढ्यार संघर्ष कर्टी आघ बहर्टी और जहन उत्साह, जाँगर व हौसला डेना काम कर्ली । पाछ परल थारु  समुदायम जरम पाईल छाईहुकन घरक काम काज केल करैना ड्वासर घर जैना जाट ट हो कैख पहर लिख नि डेना कुरीटि व कुसंस्कारके विरुद्ध आवाज उठाक सक्कु जहन समानटाक भाव हुई पर्ठा कटी गाउँ घरम जनचेटना जगैना काम फे स्यानी कर्ली । स्यानी ७ वर्षक उमेरम कक्षा २ पहर्ना व्याला जो आपन गाउँम स्कुल नि जैना लौरा, लौउ¥या हुकन स्कल जाए प्रेरणा डेटी आपन जानल बाट स्कुल से आके सन्झ्याकुन सिखाइट । स्यानी थारु समुदायम रहल कमैया कम्लहर बैठना प्रथा हटाइक लाग लम्मा समयसम्म ढ्यार योगदान कर्ली ।

२०६१ सालम “दिदीघर” संस्था खोलके सक्कु छाई छावन स्कुल पठैना वाटावरण मिलैटी अनाथ लौरा लवण्डि हुकन निःशुल्क शिक्षा डेना व जन्नी मनैन  सिपमूलक टालिम डेटी आत्मनिर्भर बनैली ।

असिख समाज सेवा कैख रमैना स्यानी गइल २०७९ सालके स्थानीय तहके चुनावम तुलसीपुर उपमहानगरपालिकाक उप–प्रमुखम जिट्ली । आब उहाँ सुशासन, शिक्षा, स्वास्थ्य ओ विकासके कामम जोर डेटी ढेर काम कैख तुलसीपुर उपमहानगरपालिकाक जनता हुकनके लाग समृद्ध व शान्त समाज बनैनाम योगदान पुगैटी आरली । ओस्टख तुलसीपुर उपहानरपालिका वडा नं. १२ म रहल दाङके टरिगाउँ एयर्पोटके विकासके लाग फे आवाज उठैटी सक्कु जहेन से सल्ला लेटी राटडिन नि कैख काम कर्टी आरली । उहाँ कठी मै आपल स्याकलसम तुलसीपुरह मजा बनाख तुलसीपुरके जनटा हुनके सेवा कर्ना मन बा ।

सगसंग उहाँ घरक आर्थिक अवस्था कमजोर रहल लर्का पर्कन पह्ररैटी अइलबाटी । उपमेयर होख फे समाजसेवा कर्ना काम नै छोर्ल हुइटी । यही वर्ष केल ४ सय जन आर्थिक समस्या हुइलक लर्का हुकन गुणस्तरीय व उच्च शिक्षा हाँसिल करही कना उद्देश्यले छात्रवृत्ति स्वरुप कलम, कपी, झ्वाला व ड्रेस प्रदान कर्ली कलसे अनाथ व असहाय ३२ ठो लर्का हुकन आपन घरम संरक्षण डेटी ग्रेट अरनिको इङलिस सेकेन्डरी स्कुलम पहर्ना व्यवस्था मिलैल बाटी । ओस्तख बिएएलएल ३ जहन ओ, ८ जहन क्याम्पस पह्रैना सहयोग कर्लबाटी ।

मै स्कुल पहर्ना व्याला अतिरिक्त क्रिया कलापम भाग लेख अइलक पैसा ओ कभुकाल आपन डाई पैसा चोर्क पहर्नु स्यानी कठी मै स्कुल जाइक टे ढेर दुख पैनु उह होर्से फे पहर्ना चाहना हुइलक लर्काहुक्र कापी कलम निपाख स्कुल जाएसे बञ्चित निहुही कैख सहयोग गर्ठु अइना डिनम फे सहयोग कर्टी रहम स्यानी कठी । ओत्रकेल निहोख स्यानी दुख बेराम परल हुकन सहयोग कर्टी आरली कलसे थारु रिटिरिवाजके संरक्षण करक लाग भुह्यार ठन्वा बनाइक लाग फे व्यक्तिगत रुपम सहयोग कर्ल बाटी । डिनभर उपमहानगरपालिकाके कामसे फुर्सद निपैना स्यानी सन्झ्या विन्या आपन घरम बैठल लर्का पर्का हुकनसे रमैठी । स्यानी कठी मै दिनभर काम कैख डट्करल रठु सन्झ्या घर अइलसे छाई छावन डेक्ठु ट सक्कु डट्कराउन मेट्ठा ।

आपन जीवन जो समाज सेवा कैख वितैना हुकाहार सोच बाटिन् । तुलसीपुर उपमहानगरपालिका ह समृद्ध बैना हुकाहार चाहना बाटिन् । असिख आपन जीवनम अथक प्रयास व संघर्ष कैख नाउ कमाए सफल हुइलक स्थानी चौधरीके जत्रा नाउ चलैलसे फे कम हुइठा ।