काठमाडौं, २५ पुस। कहिले ‘यती,ओम्नी’ हरुले नेपाली राजनीतिमा ‘तरंग’ ल्याए । राजनीतिक दलका ‘हेभिवेट’ नेताहरुको ‘कनेक्सन’ मा अगाडी बढेका यती ओम्नीहरुले नेपाली समाजलाई ‘नेता र अर्थ’ बीचको घनिष्ठताबारे राम्रो सन्देश दिए । नेपाली राजनीतिलाई व्यापारिक घराना, ठेकेदार तथा माफियाहरुले ‘ड्राईभ’ गरिरहेको सन्देश पाईरहेको नेपाली समाजका सामु दल र नेता ‘छिछि र दुरदुर’कै अवस्थामा पुग्दैछन्, यो समाज बोलिरहेको छ ।
त्यसो त, कांग्रेसको महाधिवेशनमा राप्रपाका अध्यक्ष राजेन्द्र लिङ्देनले ‘नेताहरुलाई कुकुर आयो’ भनेर गाउँमा भन्न थालेको भाषण गरेपछि केपी ओली, माधव कुमार नेपाल, पुष्पकमल दाहाल जस्ता हेभिवेट नेताहरुले लिङ्देनको उछितो काडे । तर उनीहरुको उछितोका सामु ओम्नी र यती ‘हर्कत’ को प्रश्न उठाउने हो भने त नेपाली समाजले के लिङ्देनले भनेजस्तै नभन्ला त ? हेभिवेटहरुकै कनेक्सनमा ओम्नी यतीहरु आए, गए । नेपाली राजनीतिमा ओम्नी र यतीको विषय पनि सेलाउँदै गयो ।
नेपाली राजनीतिमा अहिले पनि विद्यमानमा अर्को तरंगको विषय एमसीसी बनिरहेकै छ । सत्ता गठबन्धनको आयु माथिनै धावा बोलिरहेको एमसीसी नेपालको राजनीतिमा झन ठूलो तरंग बनेको छ । एमसीसी पास गर्न हुन्छ र हुन्न भन्ने दुईधारको नेपाली धारणाको निचोड के हुने ? भन्ने अन्यौलताले नेपाली समाजलाई राजनीतिक दलप्रति हेर्ने दृष्टिकोणलाई थप दूषित बनाइरहेकै छ ।
त्यसो त, यो विषय पनि ओम्नी र यतीकै जस्तै हेभिवेटहरुको स्वार्थ पक्कै छ । पास हुनुपर्छ भन्नेहरुले यसको विशेषताको तर्क भन्दा पनि ‘पास हुनै पर्छ, गराएरै छोडिन्छ’ भन्दै बोल्ने ‘धावा’ ले नेपाली समाज ‘कन्फ्युजन’ मा छ । अनि ‘पास हुनु हुँदैन’ भन्ने हरुले यसको नकारात्मक पक्षलाई आम नेपाली सामु एक एक केलाएर यसका सम्भावित दुरगामी असरहरुका बारेमा नबोल्नुले पनि नेपाली समाजलाई ढाँटिरहेकै छन् ।
खैर ! दलहरुबीचको ‘एमसीसी लडाई’ तत्कालै साम्य भएर नेपाली राजनीति एमसीसी तरंगबाट उन्मुक्त हुने सम्भावना त झिनो छ नै । एमसीसीमै अल्झिरहेको नेपाली राजनीतिलाई नारायणहिटिमा चलेको बेजोड ‘बतास’ ले पुनः राजनीति ‘ओज’ लाई उडाई दिएको छ । बताससँग आरजु राणा देउवाको संलग्नता रहेको चर्चा चल्नुले बताससँगको साईनो सिधै प्रधामन्त्री शेरबहादुर देउवासँग छ कि भन्ने आशंका जन्माईदिएको छ ।
त्यसो त, देउवा निकटताका कारण पनि बतास समूह ‘उड्न’ पाएको लख काटिएका छन् । योगेश भट्टराई पर्यटनमन्त्री हुँदा उनले नै बतासलाई नारायणहिटीमा प्रवेश गर्न दिने भनेर बोल्नुले अर्का हेभिवेट मध्यकै ‘बतास कनेक्सन’ उदांगियो । बतास कम्पनका मालिक आनन्द बतासले आफू एमाले अध्यक्ष केपी शर्मा ओलीको ज्वाईँ नै भएको बताएपछि त नेपालको राजनीति र व्यापारिहरुसँगको नेताहरुको साँठगाँठको लीला छरपष्टै भयो ।
पर्यटनमन्त्री प्रेम आलेले नारायणहिटीमा हुईकिन थालेको बतासमाथि सन्नाटा ल्याईदिए । अनि नेताहरुको कनेक्सनका ‘बतास गाथा’ हरु सार्वजनिक हुँदै गए । बतास ठिक हो या हैन ? यात नारायणहिटिमा ‘व्यापार’ चलाउन उसले मिल्छ वा मिल्दैन ? कनेक्सन जोडिएका नेताहरु यी प्रश्नको डिफेन्समा छैनन् । बरु बताससँगको साईनो मेट्नमै उद्धत छन् । यसले पनि बतास ठिक हैन भन्ने सन्देश आमजनमानसमा गएको त छ नै, त्यससँगै नेताहरुको ‘सम्बन्ध’ गलत ‘बतास’ हरु सँगै उडिरहेको छ भन्ने प्रमाण पनि पेश भएको छ ।
