तुलसीपुर/तुलसीपुर उपमहानगरपालिकाका प्रमुख टिकाराम खड्काले सर्पले डसेमा झारफुक गर्नतर्फ नलाग्न आग्रह गर्नुभएको छ । सर्पदंशका कारण ज्यान गुमाएका तुलसीपुर १९ का पहरु चौधरीको घरमा आयोजित श्रद्धाञ्जली सभालाई सम्बोधन गर्दै नगर प्रमुख खड्काले सर्पले डसेमा झारफुक तर्फ नलागी अस्पताल जानुपर्ने बताउनुभयो ।
सर्पदंशका कारण बिरामी परेकाहरु रुढीवादी परम्परा झारफुकमा लाग्दा अकालमै ज्यान गुमाउने गरेको भन्दै सर्पले टोकेमा तत्काल बिरामीलाई अस्पताल लैजानुपर्ने बताउनुभयो । ५७ बर्षिय चौधरीको गत असार ११ गते गोमन सर्पको टोकाई बाट ज्यान गएको थियो । स्वर्गीय चौधरी २०५४ मा साविक बिजौरी गाविसको वडा नम्वर ८ मा एमालेका तर्फबाट वडा सदस्यमा निर्वाचित भएका थिए । घर नजिकै बारीमा गोमन सर्पले टोकेपछी अस्पताल नलगी झारफुक गर्न लगेकाले समयमै उपचार नपाई ज्यान चौधरीको मृत्यु भएको थियो ।
श्रद्धाञ्जली सभामा एमाले दाङका जिल्ला कमिटी सदस्य माधव वली,एमाले तुलसीपुरका सचिव रुपबहादुर खत्री,तुलसीपुर १९ का वडा अध्यक्ष प्रेमनाथ योगी, पूर्व वडा अध्यक्ष रामबहादुर योगी लगाएतले स्वर्गीय चौधरीको जीवनीको चर्चा गर्दै उहाँको निधनले पार्टी र समाजलाई अपुरणीय क्षती भएको बताउनुभएको थियो । श्रद्धाञ्जली सभाको संचालन वडा सदस्य रामबहादुर पौडेलले गर्नुभएको थियो ।
