भरत विश्वकर्मा
रोल्पा, १६ भदौ । रोल्पामा चट्याङ लागेर तीन जना घाइते भएका छन् । घाइते एकै घरका ३ जना रहेका छन् ।
जिल्लाको माडी गाउँपालिका १ चौरका नबिराम घर्तीमगरको घरमा चट्याङ पर्दा तीन जना घाइते भएको रोल्पा प्रहरीले जानकारी दिएको छ ।
उक्त घटनामा परी घाइते हुनेहरुमा सोही ठेगानाका ५२ वर्षकी हरिकला घर्तीमगर, २४ वर्षकी सपना घर्तीमगर र ५ वर्षकी श्रीया घर्तीमगर घाइते भएको बताइएको छ ।
घाइतेहरुमा हरिकला घर्तीमगरको अवस्था गम्भीर रहेको र अन्य दुई जनाको अवस्था सामान्य रहेको साथै उनीहरुको उपचार पश्चात् डिस्चार्ज गरिएको रोल्पा प्रहरी प्रवक्ता, प्रहरी निरीक्षक केशवराज बराकोटीले जानकारी दिनुभयो।
घाइतेको स्मृति हस्पिटल घर्तिगाउँमा उपचार भईरहेको प्रहरीले बताएको छ । घटना शनिबार साँझ ५ बजेको समयमा घटेको थियो।
चट्याङ लागेर सोही स्थान बस्ने अभाष खड्काको एउटा बाख्राको समेत मृत्यु भएको प्रहरीले जनाएको छ ।
