दाङ, ३० असोज । दाङमा दाइले चक्कु प्रहार गरी भाइको हत्या गरेका छन् । मंगलबार बिहान साढे ९ बजेको समयका नगरकोट गाउँपालिका वडा नम्बर १४ घर भइ हाल दाङको बबई गाउँपालिका वडा नम्बर ४ हापुरे बजारमा डोल्मा होटेल संचालन गर्दै आएका सोमार तामाङ्को छोरा २८ वर्षीय अनिल तामाङको हत्या भएको हो ।
यसअघि अनिलले आफूले आफैलाई चक्कु प्रहार गरेको भन्ने समाचार आएको थियो । तर अनिलले आफैले चक्कु प्रहार नगरी उनका सहोदर दाइ पूर्ण तामाङले चक्कु प्रहार गरी हत्या गरेको इलाका प्रहरी कार्यालय तुलसीपुरले पत्रकार सम्मेलन गरी जानकारी दिएको छ ।
चक्कु प्रहार गरी घाइते भएका तामाङको उपचारको लागि राप्ती प्रादेशिक अस्पताल तुलसीपुर ल्याइएकोमा मंगलबार विहान पौने ११ बजे चिकित्सकले मृत घोषणा गरेका हुन् । मापसे गरेका तामाङले बावुसँग जग्गाको विषयमा झगडा गरेपछि उनका सहोदर दाजु ३२ वर्षका पूर्ण तामाङले अनिलमाथि चक्कु प्रहार गरी हत्या गरेको प्रहरीले बताएको छ ।
हत्या गरेका पूर्ण तामाङ र हत्यामा प्रयोग गरिएको चक्कुसहित प्रहरीले नियन्त्रणमा लिएको इलाका प्रहरी कार्यालय तुलसीपुरका डिएसपी अनिल ठकुरीले जानकारी दिनुभयो ।
