रुपा थापा
तुलसीपुर, ८ कात्तिक । लुम्बिनी प्रदेशका पुर्वअर्थमन्त्री धन बहादुर मास्कीले तुलसीपुर मेट्रो कलेजलाई पश्चिम क्षेत्रकै एक उत्कृष्ट कलेज बनाउनमा पहल गर्ने बताउनु भएको छ ।
तुलसीपुर मेट्रो कलेजले विहिबार आयोजना गरेको चियापान तथा शैक्षिक अन्तरक्रिया कार्यक्रमका प्रमुख अतिथि समेत रहनुभएका मास्कीले तुलसीपुर मेट्रो कलेजमा आफ्नो पहिलो सहभागिता रहेको बताउनुभयो । “आजसम्म आउँदा लोकतन्त्रको उपलब्धि भएको महसुस गरेका छौं” उहाँले भन्नुभयो “दाङको पश्चिम क्षेत्रमा स्थापना भएको तुलसीपुर मेट्रो कलेजको देशभरि चर्चा हुने गरेको छ ।”
उहाँले युवाहरु बाहिर जाने प्रवृत्तिलाई अन्त्य गर्नु्पर्ने बताउँदै यसमा राज्यको गम्भीर बन्नुपर्ने बताउनु भयो । “हाम्रो देश भौगोलिक हिसाबले धनी भएता पनि आर्थिक हिसाबले गरिब छ, त्यसैले विकास गर्न सकेका छैनौं” उहाले भन्नुभयो ।
गरिब, जेहेन्दार र बिपन्न बर्गलाई लक्षित गरी पढ्दै कमाउदै भन्ने नारा सहित आफुले अर्थमन्त्री हुँदा बजेट बिनियोजन गरेको तर कार्यन्वयन नहुँदै सरकारबाट बाहिरिनु परेको मास्कीको भनाइ थियो ।
संचालक समितिका अध्यक्ष तथा तुलसीपुर उपमहानगरपालिका मेयर टीकाराम खड्काले तुलसीपुर मेट्रो कलेज प्राबिधिक तर्फबाट राष्ट्रिय स्तरको पुरस्कार पाएकोमा अभिभावकको ठुलो हात रहेको बताउनु भयो । उहाँले मेट्रो कलेजमा अध्ययन गरेका बिद्यार्थीहरु लोकसेवाका विभिन्न पदमा नाम निकाली सफल बन्नु नै कलेजको योगदान रहेको बताउनु भयो । हामी संचालन समिति र तुलसीपुरको आमसमुदायले नै गर्व गर्ने कुरा रहेको मेयर खड्काले बताउनु भयो ।
तुलसीपुर उपमहानगरपालिकाकी उपमेयर स्यानी चौधरीको स्वागत मन्तव्यबाट सुरु भएको कार्यक्रमको सहजीकरण तुलसीपुर मेट्रो कलेकका प्रमुख वसन्त आचार्यले गर्नुभएको थियो ।
