तुलसीपुर १८ मंसिर । आज फेरी घोराही तुलसीपुर सडक अवरुद्ध भएको छ । सोमबार बेलुका टिप्परले मोटरसाईकललाई ठक्कर दिँदा युवकको मृत्यु भएपछि उनका आफन्तहरुले सडक अवरुद्ध गरेका हुन् ।
मृतकका आफन्तहरुले क्षतिपूतीको मागसहित मंगलबार बिहान ८ बजेदेखि अवरुद्ध गरेको जिल्ला प्रहरी कार्यालय दाङका प्रमुख अर्जुन तिमिल्सीनाले जानकारी दिनुभयो । आफन्तहरुले सडक अवरुद्ध गरेपछि बैकल्पिक बाटो प्रयोग गरेर सवारी साधनहरुलाई गन्तव्यमा पठाईएको प्रमुख तिमिल्सीनाले बताउनुभयो ।
घोराहीबाट तुलसीपुरतर्फ आउँदै गरेको रा १ ख १२९१ नम्बरको टिप्परले सोही दिशाबाट आउँदै गरेको रा ७ प ७४६ नम्बरको मोटरसाइकललाई झारबैरामा ठक्कर दिँदा तुलसीपुर १९ कुटीचौर निवासी १९ वर्षका सुदिप बुढाथोकीको मृत्यु भएको हो । मोटरसाइकलमा सवार तुलसीपुर– १७ निवासी २२ वर्षका दिपक बस्नेत घाइते भएका छन् । सडक खुलाउने विषयमा पहल भई रहेको प्रहरीले बताएको छ ।
