काठमाडौँ, १३ चैत । बालुवाटारस्थित प्रधानमन्त्री निवासमा सत्ता गठबन्धनको बैठक सुरु भएको छ । बैठकमा सरकारमा रहेका र सरकारलाई समर्थन गर्ने दलहरूको सहभागिता रहेको छ ।
बैठकमा प्रधानमन्त्री एवं एमाले अध्यक्ष केपी शर्मा ओली, कांग्रेस सभापति शेरबहादुर देउवा, जनता समाजवादी पार्टी नेपालका अध्यक्ष उपेन्द्र यादव सहभागी हुनुहुन्छ ।
यस्तै जनमत पार्टीका अध्यक्ष सिके राउत, नागरिक उन्मुक्ति पार्टीकी अध्यक्ष रन्जिता श्रेष्ठ चौधरी, लोसपा अध्यक्ष महन्थ ठाकुर, जसपा अध्यक्ष अशोक राई लगायतका प्रतिनिभिहरु पनि सहभागी हुनुहुन्छ ।
बैठकमा एमाले र कांग्रेसका अरू नेताहरू पनि सहभागी छन् । बैठकमा समसामयिक राजनीतिक घटनाक्रम, सरकार सञ्चालन तथा संसद्मा विचाराधीन कानुनहरूको निर्माणका विषयमा समेत छलफल हुने नेताहरूले जनाएका छन् ।
