काठमाडौं, १६ बैशाख । सरकारले ऊर्जा राज्यमन्त्रीमा नियुक्त गरेका नेपाली कांग्रेसका खमबहादुर गर्बुजाको शपथग्रहण कार्यक्रम स्थगित भएको छ । प्रधानमन्त्रीका प्रेस संयोजक प्रकाश सिलवालका अनुसार, आज बिहान १० बजेका लागि तय गरिएको शपथग्रहण कार्यक्रम अनिश्चितकालका लागि रोकिएको हो ।
शपथग्रहण कार्यक्रमसँगै आज बस्ने भनिएको मन्त्रिपरिषद् बैठक पनि अर्को सूचना नआउञ्जेलका लागि स्थगित गरिएको सिलवालले जानकारी दिएका छन् । यद्यपि, कार्यक्रम स्थगनको कारणबारे कुनै आधिकारिक जानकारी सार्वजनिक गरिएको छैन ।
सरकारले बिहीबार गर्बुजालाई ऊर्जा मन्त्रालयको राज्यमन्त्रीमा नियुक्त गरेको थियो । शपथग्रहण र मन्त्रिपरिषद् बैठक दुबै कार्यक्रम स्थगन हुनुलाई राजनीतिक वृत्तले चासोका साथ हेरिरहेको छ ।
