काठमाडौं, ११ मंसिर । ललितपुर कांग्रेस जिल्ला सभापतिका लागि मतदान सुरु भएको छ । शनिबार बिहान ९ बजेदेखि मतदान सुरु भएको हो ।
ललितपुर कांग्रेस सभापतिका लागि शुक्रबार मनोनयन दर्ता भएको थियो, जस अनुसार पूर्व सभासद् रामकृष्ण चित्रकार, तरुण दलका नेता मिनकृष्ण महर्जन र जीतेन्द्र श्रेष्ठले उम्मेदवारी दिनुभएकाे छ ।
चित्रकारको सभापतिसहित छुट्टै प्यानल छ तर महर्जन र श्रेष्ठको भने सभापतिमा मात्रै छुट्टै प्यानल छ । बाँकी पदाधिकारी र सदस्यमा दुवैका समान उम्मेदवार छन् ।
चित्रकारलाई वर्तमान सभापति मदन अमात्य, पूर्व सांसद चन्द्र महर्जन, ललितपुर महानगरपालिकाका प्रमुख चिरिबाबु महर्जनको साथ छ ।
उता, महर्जनलाई कांग्रेस नेता उदयशमशेर राणा, तरुण दलका अध्यक्ष जितजंग बस्नेतलगायतको समर्थन छ । श्रेष्ठलाई प्रकाशमान सिंहको समर्थन छ ।
तीनजना उम्मेदवार उत्तिकै सशक्त रहेकाले पहिलो राउन्डमै नतिजा नआउने र दोस्रो चरणमा चुनावमार्फत परिणाम आउने कांग्रेस नेताहरू बताउँछन् ।
