काठमाडौं, असोज २८ । राष्ट्रिय स्वतन्त्र पार्टी (रास्वपा) संसदीय दलका उपनेता गणेश पराजुलीले हिमालय संरक्षण, जलवायु परिवर्तनको प्रभाव न्यूनीकरण तथा उद्योग, शिक्षा र प्रविधिमार्फत नेपालको आर्थिक रूपान्तरणका लागि अन्तर्राष्ट्रिय सहकार्य आवश्यक रहेको बताउनुभएको छ ।
चिनियाँ जनताको वैदेशिक मैत्री संघद्वारा “दिगो भविष्यका लागि गुणात्मक वृद्धिमा साझेदारी” भन्ने नारासहित चीनमा आयोजित सन् २०२६ को लेजिस्लेटर्स फोरम फर फ्रेन्ड्ली एक्सचेन्जेसमा नेपालको प्रतिनिधित्व गर्दै उहाँले यस्तो धारणा राख्नुभयो ।
उक्त कार्यक्रममा ५२ देशका सभामुख, उपसभामुख, मन्त्री तथा सांसदसहित ६६ जनाभन्दा बढी कानुन निर्माता सहभागी रहेको बताइएको छ। कार्यक्रममा पराजुलीले “उद्योग, शिक्षा र नयाँ गुणात्मक उत्पादक शक्ति” विषयमा नेपालको दृष्टिकोण प्रस्तुत गर्नुभयो ।
हिमालयमा जलवायु परिवर्तनको प्रभाव, जलवायु न्याय र भोटेकोशी–त्रिशूली विपद्सम्बन्धी संसदीय विशेष समितिका सभापति रहेका पराजुलीले हिमनदी पग्लिनेक्रम, बाढी तथा पहिरोजस्ता जलवायुजन्य विपद्का प्रभाव कुनै एक देशको सीमामा मात्र सीमित नहुने उल्लेख गर्नुभयो । हिमालय संरक्षण, प्रभावकारी विपद् पूर्वसूचना प्रणाली र जलवायु उत्थानशीलताका लागि विश्वव्यापी ऐक्यबद्धता तथा सहकार्य आवश्यक रहेको उहाँको भनाइ छ ।
नेपालको आर्थिक रूपान्तरणका लागि शिक्षा र उद्योगबिचको दूरी अन्त्य गर्दै व्यावहारिक सीप विकास, अनुसन्धान, नवप्रवर्तन र प्रविधि हस्तान्तरणलाई प्राथमिकता दिनुपर्नेमा पराजुलीले जोड दिनुभयो। शैक्षिक संस्थालाई उद्योगको आवश्यकतासँग जोडेर युवाका लागि स्वदेशमै मर्यादित रोजगारीका अवसर सिर्जना गर्नुपर्ने बताउनुभयो ।
त्यसैगरी, नेपाली हस्तकला, कृषि उत्पादन तथा जडीबुटीलाई आधुनिक प्रविधि र अन्तर्राष्ट्रिय बजारसँग जोड्न सके निर्यात प्रवर्द्धन र आर्थिक विकासमा योगदान पुग्ने उहाँको धारणा छ । नेपाल–चीन सहकार्यका सम्भावनाबारे चर्चा गर्दै पराजुलीले सूचना प्रविधि, कृत्रिम बौद्धिकता, डिजिटल सीप, अनुसन्धान तथा नवप्रवर्तनको क्षेत्रमा सहकार्य विस्तार गर्नुपर्ने उल्लेख गर्नुभयो । चीनको औद्योगिक तथा प्राविधिक अनुभवलाई नेपालको युवा जनशक्ति र उद्यमशीलतासँग जोड्न सके रोजगारी सिर्जना र दिगो आर्थिक विकासको नयाँ अवसर खुल्ने बताउनुभयो ।
नेपाल र चीनबिचको मैत्रीपूर्ण सम्बन्धलाई शिक्षा, प्रविधि, लगानी र युवा जनशक्ति विकासमा केन्द्रित व्यावहारिक साझेदारीमा रूपान्तरण गर्नुपर्नेमा जोड दिँदै पराजुलीले साझा प्रयासबाट दिगो विकास र पारस्परिक समृद्धि हासिल गर्न सकिने धारणा राख्नुभयो । पराजुलीको सचिवालयका अनुसार उहाँ कार्यक्रम सम्पन्न गरी बिहीबार नेपाल फर्कने कार्यक्रम छ।
L
