काठमाडौँ, असोज ३० । प्रधानमन्त्री वालेन्द्र शाहको भारत भ्रमण आगामी मङ्सिर दोस्रो साता हुने भएको छ। परराष्ट्रमन्त्री शिशिर खनालले आज सञ्चारकर्मीहरूसँगको कुराकानीमा प्रधानमन्त्री शाहको भारत भ्रमण हुने बताउनुभयो ।
विभिन्न सञ्चारमाध्यममा प्रधानमन्त्री शाहको भारत भ्रमण आगामी मङ्सिर दोस्रो साता हुने समाचारहरू सार्वजनिक भएका छन्। मन्त्री खनालले भन्नुभयो, “आजको दिनसम्म हामीले औपचारिक रूपमा निश्चित गरिरसकेका छैनौं ।” वर्तमान सरकार गठन भएदेखि नै भारत सरकारसँग नियमित सम्पर्क भइरहेको जानकारी गराउँदै उहाँले प्रधानमन्त्रीको आगामी भ्रमण परिणाममुखी र उपलब्धिमूलक हुने आफूहरूको चाहना रहेको बताउनुभयो।
“भ्रमणको दौरान ‘ट्रेड र ट्रान्जिट’, कनेक्टिभिटी, ऊर्जा, सीमालगायत विषयमा सकारात्मक प्रगती होस् भन्ने छ” मन्त्री खनालले भन्नुभयो । भ्रमणको क्रममा ठुला पूर्वाधार तथा जलविद्युत् परियोजनाको उद्घाटन र शिलान्याससँगै विभिन्न सम्झौतामा हस्ताक्षर हुने बताइएको छ। गत १३ चैतमा वर्तमान सरकारको नेतृत्व सम्हाले यता प्रधानमन्त्री शाहको पहिलो पटक भारत भ्रमण हुन लागेको हो । रासस
