तेस्रो आँखा
काठमाडौं, ५ असार । काठमाडौंमा कल सेन्टर सञ्चालन गरेर अमेरिकामा ठगी गरेको आरोपमा प्रहरीले २ जना भारतीय नागरिक र ११ जना नेपाली नागरिकसहित १३ जनालाई पक्राउ गरेको छ । काठमाडौंको सामाखुशीमा अर्बिट नेक्सस प्रालि नाममा कल सेन्टर सञ्चालन गरी अमेरिकामा बस्नेहरुलाई कम्प्युटरमा म्यासेज पठाएर ठगी गरेको आरोपमा प्रहरीले उनीहरुलाई पक्राउ गरेकोे हो ।
उनीहरुले माइक्रोसफ्ट सपोर्ट सेन्टरबाट भन्दै कम्प्युटरमा म्यासेज पठाएर बैंक खाता लगायतका निजी सूचना माग गरेर पैसा ठगी गरेको पाइएको प्रहरीले जनाएको छ । पक्राउ पर्नेमा निशान गैरे, मनिष तिवारी, विजय श्रेष्ठसहित ८ जना पुरुष र ५ जना महिला रहेका छन् । उनीहरुलाई साइबर ब्यूरोले पत्रकार सम्मेलन गरेर आइतबार सार्वजनिक गरेको हो। उनीहरुबाट ९० वटा कारोबार भएको देखिएको र ती सबै ठगी हो वा होइन भन्ने विषयमा अनुसन्धान भइरहेको बताइएको छ ।
