तेस्रो आँखा
काठमाडौं,१९ असार । जनता समाजवादी पार्टी (जसपा) संघीय परिषद् अध्यक्ष डा. बाबुराम भट्टराई पक्षले छुट्टै भेला बोलाउने तयारी गरेको छ । अध्यक्ष उपेन्द्र यादवले केन्द्रीय कमिटी बैठक बोलाएको समय पारेर भेला गर्ने नेताहरुले बताएका छन् । पार्टीमा विवाद चलिरहेका बेला परिषद् अध्यक्ष भट्टराई र कार्यकारिणी अध्यक्ष यादवबीच गत बुधबार भेट भएको थियो । तर त्यो भेटपछि जसपा फुट उन्मुख छ ।
अध्यक्ष यादवले मन्त्री हेरफेरको तयारी गरेका छन् भने यही २७ र २८ गते वीरगञ्जमा केन्द्रीय समितिको बैठक बोलाएका छन् । भट्टराई पक्ष भने बैठकमा नजाने तयारीमा छ । भट्टराई स्वयं अब उपेन्द्र यादवसँग मिलेर जान सकिन्न भन्ने निष्कर्षमा पुगेको नेताहरुले बताएका छन् । यादव र भट्टराईबीच सल्लाहमै अलग अलग बाटो रोज्न गत बुधबारको भेटमा छलफल समेत भएको श्रोतको दावी छ ।
शनिबार मात्रै डा भट्टराईले गोरखा काठमाडौं सम्पर्क मञ्चको कार्यक्रममा पार्टीमा देखिएको समस्याबारे लामो सम्बोधन गरे । उनले जसपामा उन्नत, समावेशी लोकतन्त्रको अभ्यास नभएको र सानो, क्षेत्रीय र त्यसमा पनि एउटा जातको पार्टी जस्तो बनेको बताएका थिए । अब नयाँ अभियानमा अगाडि बढ्नुपर्छ भन्ने निष्कर्षमा पुगेको भट्टराईको भनाइ थियो । उनले तीन विकल्पमा छलफल प्रारम्भ गरेका छन् ।
पहिलो, कम्युनिस्ट घटकहरुले हिजोको जडतालाई छोडेर नयाँ ढंगले आउँछन् भने समाजवादी केन्द्र बनाउने भन्ने छ । त्यस्तै दोस्रोमा वैकल्पिक राजनीति भन्ने पक्षहरुसँग सहकार्य गरेर नयाँ धार सिर्जना गरेर अघि बढ्ने विषयमा छलफल सुरु गरेको उनी निकट नेताहरुले बताएका छन् । यदी यी दुइ विकप्लमा पनि कुरा नमिले छुट्टै अस्तित्वसहित अभियान अघि बढाउने र अरुसँग सहकार्य गर्ने गरी तेस्रो विकल्प भट्टराई समुहले रोजेको छ ।
