तेस्रो आँखा
काठमाडाैं, ४ साउन । तीन विद्यार्थी संगठनले गभर्नर महाप्रसाद अधिकारीको राजिनामा माग गर्दै नेपाल नेपाल राष्ट्र बैंक अगाडि कालो ब्यानर टाँसेका छन् ।
गठबन्धननिकट संयुक्त विद्यार्थी संगठनले आज बिहान बालुवाटार पुगेर बैंकको कार्यालय अगाडि कालो ब्यानर टाँसेका हुन् । उनीहरुले ब्यानर टाँसेको केहि समयमा नै प्रहरीले त्यस ब्यानरलाई हटाएको थियो । यसअघि आइतबार अखिल क्रान्तिकारी र नेविसंघले गभर्नर अधिकारीलाई कार्यालय प्रवेशमा रोक लगाउने प्रयास गरेको थियो ।
गभर्नरलाई बर्खास्त गर्नुपर्ने मागसहित सत्ता गठबन्धन दल निकटका प्रमुख तीन संगठनले आजदेखि चरणबद्ध आन्दोलन घोषणा गरेका छन् । नेविसंघ, अखिल क्रान्तिकारी र अनेरास्ववियूले ५ दिनको संघर्षका कार्यक्रम घोषणा गरेका हुन् । एमालेको अर्थ तथा योजना विभागको सदस्यको रूपमा रहेर अधिकारीले मुलुकको अर्थतन्त्र ध्वस्त पार्न सक्रिय रहेको दाबी गर्दै ती संगठनले बर्खास्तीको माग गरेका छन् ।
आन्दोलनका कार्यक्रमहरूमा प्रधानमन्त्री र सभामुखलाई ज्ञापनपत्र बुझाउने, राष्ट्र बैंकका कार्यालयमा कालो ब्यानर राख्ने, प्रज्ञा भवनमा कार्टुन प्रदर्शन गर्ने, देशभरका क्याम्पसमा विरोध गर्ने र सदनबाट गभर्नर बर्खास्तीको मागका लागि सांसदलाई दबाब दिनेसम्मका छन् ।
