काठमाडौं । सरकारले ४० माइक्रोनभन्दा पातलो प्लाष्टिकको झोला बजारमा ल्याउन प्रतिबन्ध लगाएको छ । मापदण्ड बाहिरका प्लाष्टिकका झोला उत्पादन, आयात, बिक्रि–वितरण तथा प्रयोग गर्न भदौ १ गते बुधबारदेखि निषेध गरिदिएको हो ।
निर्णयको कार्यान्वयन भए/नभएको बारे कडा अनुगमन हुने वातावरण विभागले जनाएको छ । सरकारले २०७८ साल असोज १९ गतेको राजपत्रमा ४० माइक्रोनभन्दा पातलो प्लाष्टिक झोला उत्पादन, आयात, बिक्री वितरण तथा प्रयोगमा प्रतिवन्ध लगाएको सूचना राजपत्रमा समेत प्रकाशित गरिएको थियो ।
सो निर्णयलाई अब भने भदौ १ गतेदेखि कडाईका साथ पालना गरिने विभागको भनाइ छ । मापदण्ड विपरितका प्लाष्टिकका वस्तुको प्रयोग वा बिक्रिवितरण गरिए वातावरण संरक्षण ऐन र नियमावली अनुसार कारावाही गरिने विभागले चेतावनी दिएको छ । यसअघि पनि सरकारले पातला प्लाष्टिकको झोला प्रयोगमा प्रतिबन्ध लगाए पनि कार्यान्वयन हुन सकेको थिएन ।
मन्त्रिपरिषदले २०७८ माघ १७ गते प्लाष्टिक झोला प्रतिवन्ध सम्बन्धी कार्ययोजना २०७८ समेत स्वीकृत गरेको थियो । यस निर्णयलाई नै भदौ १ गतेदेखि कडाईका साथ पालना गरिने विभागले जनाएको छ । कोभिड १९ का कारण सरकारले बीचमा पातलो प्लाष्टिकको झोला बजारमा ल्याउन प्रतिबन्ध लगाउने निर्णयलाई खुकुलो छाडेको थियो ।
